वैशाख ७, काठमाडौं । सिटिजन्स बैंक इन्टरनेशनल लिमिटेड बुधवारदेखि १६ औं वर्षमा प्रवेश गरेको छ ।
कम्पनीको १५ औं वार्षिकोत्सव कार्यक्रमलाई सम्बोधन गर्दै सञ्चालक समितिका अध्यक्ष राजन सिंह भण्डारीले संस्थाले जहिले पनि संस्थागत सुशासनको उच्चतम मापदण्डहरू कायम राख्दै आएको र आगामी दिनमा पनि त्यसलाई निरन्तरता दिने बताए ।
सो अवसरमा कम्पनीले चालू आर्थिक वर्षको तेस्रो त्रैमाससम्ममा कुल निक्षेप करीब १ खर्व ४६ अर्ब ६१ करोड रुपैयाँ रहेकोमा कर्जातर्फ १ खर्ब ३६ अर्व ७२ करोड रुपैयाँ रहेको र उक्त अवधिमा करीब १ अर्ब ५८ करोड ९६ लाख खुद मुनाफा गरेको जानकारी दिइयो ।
कम्पनीले उक्त अवसरमा सात ओटै प्रदेशमा प्रभातफेरी कार्यक्रम तथा नेपाल रेडक्रस सोसाईटीसँगको सहकार्यमा करीब ४००जना रक्तदाताको सहभागीतामा रक्तदान कार्यक्रम आयोजना गरिएको बताएको छ ।
कम्पनीका प्रमुख कार्यकारी अधिकृत गणेशराज पोखरेलले बैंकले आफ्नो प्रक्रिया र प्रणालीलाई डिजिटल रूपान्तरण गर्ने आधार तयार गरिसकेको र डिजिटल रूपान्तरण रणनीतिलाई निर्दिष्ट समयसीमा सहित डिजिटल रूपान्तरणका लागि २२ सम्भावित क्षेत्रहरू स्पष्ट रूपमा राखेको बताए ।
विसं २०६४ वैशाख ७ गतेदेखि २० औं वाणिज्य बैंकको रुपमा स्थापना भएको उक्त कम्पनीले सात ओटै प्रदेशका १७४ ओटा शाखामार्फत बैंकिङ्ग सेवा दिंदै आएको छ ।
