रौतहट। धान, मकै, गहुँ, तोरी, मुसुरोजस्ता अन्नबालीको उत्पादन गर्दै आएका चन्द्रपुर नगरपालिका–३ गैंडाटारका कृषक पछिल्लो समय केराखेतीतर्फ आकर्षित हुन थालेका छन् ।
केराखेतीबाट राम्रो आम्दानी हुने भएपछि यहाँका कृषकले अन्नबाली लगाउन कम गरेका हुन् । अन्नबाली उत्पादनका लागि लगानी र परिश्रम दुवै बढी लाग्ने, तर उत्पादन अपेक्षित रूपमा कम हुने गरेकाले यहाँका कृषकले केराखेतीलाई प्राथमिकता दिन थालेका हुन् ।
गैंडाटारका कृषक दिपक श्रेष्ठले एउटा केराको बोटमा एकपटकमा ८० देखि १०० ओटा केरा उत्पादन हुने र जुन प्रतिगोटा ५ देखि ६ रुपैयाँसम्ममा विक्री हुने गरेको बताए । कठ्ठाको ६ हजार रुपैयाँमा जग्गा भाडामा लिएर व्यावसायिक केराखेती गरेका उनले अन्नबाली भन्दा राम्रो आम्दानी गरेको बताए ।
केरा उत्पादन गरेर यहाँका कृषकले वर्षमा १० देखि १५ लाख रुपैयाँसम्म कमाउने गरेको उनको भनाइ छ । एकपटक उत्पादन नहुन्जेल मेहनत र लगानी गर्नुपर्ने र उत्पादन हुन थालेपछि धेरै लगानी गर्नु नपर्ने उनले बताए । गैंडाटार क्षेत्रमा मात्र २५ बिगाहाभन्दा बढी क्षेत्रफलमा कृषकले केराखेती गर्दै आएका छन् । बजारमा केराको माग उच्च रहेको र केरा व्यापारी खेतसम्म खरीदका लागि आउने गरेकाले बजारीकरणमा कुनै समस्या नरहेको उनीहरू बताउँछन् ।
वैदेशिक रोजगारबाट फर्किएका युवासमेत केराखेतीमा लागेका छन् । केराखेतीतर्फ कृषकको आकर्षण बढे पनि स्थानीय तहबाट सहयोग प्राप्त नभएको कृषकको गुनासो छ । गाउँका अधिकांश कृषकले केराखेती नै गरेकाले आगामी दिनमा गैंडाटारलाई केराको पकेट क्षेत्रको रूपमा विकास गर्ने योजना रहेको चन्द्रपुर नगरपालिकाले जानकारी दिएको छ । कृषकलाई प्रोत्साहन र उत्पादन वृद्धिका लागि नगरपालिकाले विभिन्न योजना ल्याउने बताएको छ ।
व्यावसायिक रूपमा केराखेती हुँदै आए पनि कृषक कृषि बीमा लगायतका सुविधाको बारेमा जानकार नरहेको वडाध्यक्ष बोधनाथ देवकोटाले बताए । कृषि बीमालाई प्रोत्साहन गर्ने उद्देश्यले सचेतना कार्यक्रम गर्ने योजना रहेको उनको भनाइ छ ।
