सानिमा मिडिल तमोरको आईपीओमा माग भन्दा २.६१ गुणा बढी आवेदन, कहिलेसम्म आवेदन दिन पाइन्छ ?

काठमाडौं । सानिमा मिडिल तमोर हाइड्रोपावर लिमिटेडले निष्कासन गरेको आईपीओमा माग भन्दा २ दशमलव ६१ गुणा बढी आवेदन परेको छ । सिडिएस क्लियरिङ्ग लिमिटेडका अनुसार सोमवार बिहान १०ः२२ सम्ममा ९ लाख ४१ हजार ५१६ जना आवेदकले १ करोड ११ लाख २१ हजार ६१० कित्ताका लागि आवेदन दिएका हुन ।  कम्पनीले फागुन २६ गते देखि सर्वसाधारणमा आईपीओ निष्कासन गरेको हो ।   कम्पनीले पहिलो चरणमा आयोजना प्रभावित स्थानीय र  वैदेशिक रोजगारीमा रहेका नेपालीमा आईपीओ विक्री तथा बाँडफाँट गरी दोस्रो चरणमा सर्वसाधारणमा आईपीओ विक्री खुला गरेको हो ।  कम्पनीले जारी पूँजी रू. ३ अर्ब ३३ करोड २५ लाखको १५ प्रतिशत अर्थात रू. ८९ करोड ९८ लाख ७५ हजार बराबरको ४९ लाख ९८ हजार ७५० कित्ता साधारण शेयर सर्वसाधारणका लागि छुट्याएको थियो । कुल कित्तामध्ये १० प्रतिशत अर्थात ४ लाख ९९ हजार ८७५ कित्ता शेयर वैदेशिक रोजगारीमा रहेका नेपाली र ५ प्रतिशत अर्थात २ लाख ४९ हजार ९३६ कित्ता शेयर सामूहिक लगानी कोषहरूमा बाँडफाँट गरिसकेको छ । बाँकी ४२ लाख ४८ हजार ९३८ कित्ता शेयर सार्वजनिक निष्कासनमा ल्याएको हो ।   यो आईपीओ खरीदका लागि न्यूनतम १० देखि अधिकतम २० हजार कित्ताका लागि आवेदन दिन सकिनेछ । कम्पनीको आईपीओमा लगानीकर्ताले भोलि मंगलवार अर्थात फागुन ३० गते बैंकिङ्ग समय सम्म आवेदन दिन सक्नेछन् ।  आईपीओ निष्कासनको लागि गराएको रेटिङमा केयर रेटिङ नेपालले कम्पनीलाई दायित्व वहन गर्ने क्षमतामा उच्च जोखिम रहेको संकेत गर्ने केयर एनपी डबल बी इस्युअर रेटिङ प्रदान गरेको छ ।  कम्पनीको शेयर निष्कासन तथा बिक्री प्रबन्धक सानिमा क्यापिटल लिमिटेड रहेको छ । विक्री प्रबन्धकसँगै लगानीकर्ताले नेपाल धितोपत्र बोर्डबाट स्वीकृति प्राप्त सम्पूर्ण सी(आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरूबाट आवेदन दिन सक्नेछन् । कम्पनीले ताप्लेजुङ जिल्लामा ७३ मेगावाट क्षमताको मध्य तमोर जलविद्युत्त आयोजना निर्माण गरिरहेको छ । यही आयोजना निर्माणका लागि कम्पनीले आईपीओ जारी गर्न लागेको हो । यस आयोजनाको कुल लागत १३ अर्ब ३३ करोड रुपैयाँ रहेको छ ।