काठमाडौं । धितोपत्र दोस्रो बजारको समग्र कारोबार मापक नेप्से परिसूचक २ हजार ७० दशमलव ४१ विन्दुमा झरेको छ । गत साताको चार कारोबार दिनमा बजार निरन्तर घटेर २ हजार १०० विन्दुमुनी झरेको हो । अघिल्लो साताको अन्तिम कारोबार दिन २ हजार १८२ दशमलव ६३ विन्दुमा बन्द भएको बजार चार कारोबार दिनमा ११२ दशमलव २२ अंक घटेको हो ।
पहिलो कारोबार दिन ६० दशमलव ७७ अंकले घटेको बजार दोस्रो कारोबार दिन १६ दशमलव ४० अंक, तेस्रो कारोबार दिन १३ दशमलव ९० अंक र चौथो कारोबार दिन २१ दशमलव १५ अंकले घटेको हो । गत साताको कारोबारमा लगानीकर्ता निरास भई शेयर विक्रीप्रति बढी केन्द्रित भएको देखिन्छ ।
सूचनामा केन्द्रित धितोपत्र दोस्रो बजारका लगानीकर्ता हरेक दिन बजारप्रतिको सकारात्मक सुचनाको पर्खाइमा रहने गर्दछन् । १४ लाखभन्दा बढी लगानीकर्ता सहभागी भैसकेको धितोपत्र दोस्रो बजारप्रति सरकारसँगै सरोकारवाला निकायले विशेष ध्यान दिनुपर्ने माग लगानीकर्ताको छ । गत साता नेपाल राष्ट्र बैंकले मौद्रिक नीतिको समिक्षा गरेको थियो ।
बैंक तथा वित्तीय संस्थाकै बढी स्वामित्व रहेको धितोपत्र दोस्रो बजार सुधारका पक्षमा उक्त समिक्षामार्फत केहि नयाँ कुरा आउने आशा लगानीकर्ताले गरेका थिए । तर बजारको विषयमा मौद्रिक नीतिको समिक्षाले कुनै पनि सम्बोधन नगरेपछि लगानीकर्ता निरास बनेको जानकारहरूको बुझाइ छ । लगानीकर्ताले मार्जिन कर्जाको विषयमा थप परिमार्जनसहित केहि नयाँ कुरा मौद्रिक नीतिको समिक्षामा समेटिने आशा गरेको जानकारहरू बताउँछन् ।
लगानीकर्ताको उत्साहमा अघि बढ्ने बजार गत साता भने पछि धकेलिएको छ । नेप्से परिसूचकसँगै बजारका महत्वपूर्ण सूचकहरू अघिल्लो साताको तुलनामा गत साता घटेका छन् । सेन्सेटिभ अघिल्लो साताको अन्तिम कारोबार दिन ४१५ दशमलव ४२ विन्दुमा रहेकोमा गत साता ३९६ दशमलव ४४ विन्दुमा झरेको छ ।
त्यस्तै कारोबार रकम पनि अघिल्लो साताभन्दा रू. ४ अर्ब २६ करोडभन्दा बढीले घटेको छ । अघिल्लो साताको तुलनामा एक दिन कम कारोबार भएपछि गत साता औषतमै कारोबार रकम रू. ४४ करोड १३ लाखभन्दा बढीले घटेको हो । अघिल्लो साता रू. १२ अर्ब ५२ करोडभन्दा बढीको ३ करोड ३६ लाख १३ हजारभन्दा बढी कित्ता धितोपत्र कारोबार भएकोमा गत साता रू. ८ अर्ब २५ करोडभन्दा बढीको २ करोड २३ लाख ८८ हजारभन्दा बढी कित्ता धितोपत्र कारोबार भएको हो ।
गत साता चार कारोबार दिनमा लगानीकर्ताले रू. १ खर्ब ६१ अर्बभन्दा बढी गुमाएका छन् । अघिल्लो साताको अन्तिम कारोबार दिन रू. ३१ खर्ब ४९ अर्ब ६५ करोड ४७ लाख रहेको कुल बजार पूँजीकरण गत साताको अन्तिम कारोबार दिन रू. २९ खर्ब ८७ अर्ब ७१ करोड १९ लाखमा झरेको हो ।
वित्त र जलविद्युत् समूहको परिसूचक ७ प्रतिशतभन्दा बढीले घट्यो
गत साता कारोबारमा आएकासबै समूहगत परिसूचकहरू अघिल्लो साताको तुलनामा घटेका छन् । गत साताको कारोबारमा परिसूचकमा आएको कमिका आधारमा वित्त र जलविद्युत् समूहले सर्वाधिक गुमाएको देखिएको छ । वित्त समूहको सर्वाधिक ७ दशमलव ४५ प्रतिशत परिसूचक घटेको छ भने जलविद्युतको सर्वाधिक दोस्रोमा ७ दशमलव १९ प्रतिशत परिसूचक घटेको छ ।
त्यस्तै लगानीको ६ दशमलव ६५ प्रतिशत, जीवन बीमाको ६ दशमलव ३८ प्रतिशत, विकास बैंकको ६ दशमलव २८ प्रतिशत, होटल तथा पर्यटनको ५ दशमलव ९६ प्रतिशत, निर्जीवन बीमाको ५ दशमलव १३ प्रतिशत, लघुवित्तको ५ दशमलव शून्य १ प्रतिशतले घटेको छ ।
यसैगरी उत्पादन तथा प्रशोधनको ४ दशमलव ७६ प्रतिशत, व्यापारिकको ४ दमलव १२ प्रतिशत, अन्यको ४ दशमलव शून्य ४ प्रतिशत, बैंकिङको ३ दशमलव ८४ प्रतिशत र म्युचुअल फण्डको २ दशमलव २६ प्रतिशत परिसूचक घटेको छ ।
