सरकारले मुस्ताङमा भेल र पहिरोले पु-याएको क्षतिको तत्काल सम्बोधन गर्ने भएको छ। प्रधानमन्त्री पुष्पकमल दाहाल ‘प्रचण्ड’ ले सरकारका तर्फबाट गर्नुपर्ने सबै पहल गर्न उपप्रधानमन्त्री तथा गृहमन्त्री नारायणकाजी श्रेष्ठलाई निर्देशन दिनुभएको छ। उहाँहरूबिच भएको छलफलका क्रममा देशका विभिन्न स्थानमा भारी वर्षाबाट ज्यान जोगाउन र विपत् सामना गर्नुपरेको मुस्ताङलगायत स्थानमा आवश्यक राहत तथा उद्धार व्यवस्था गर्न गृहमन्त्री श्रेष्ठलाई प्रधानमन्त्री प्रचण्डले निर्देशन दिनुभएको हो। छलफलका क्रममा गृहमन्त्री श्रेष्ठले मुस्ताङमा भएको क्षतिको जानकारी दिँदै देशका विभिन्न स्थानमा सम्भावित क्षतिको न्यूनीकरणका लागि गृह मन्त्रालयले गरिरहेको पहलबारे प्रधानमन्त्री प्रचण्डसमक्ष बिफ्रिङ गर्नुभयो।
