काठमाडौं । कोका–कोला बेभरेज नेपाल (Coca Cola Beverage Nepal) ले ‘वाटर स्टेवार्डशिप परियोजना’ सञ्चालनमा ल्याएको छ । कम्पनीले बालाजु पार्कको बाइसधाराको पुनरुत्थान र वाश प्रणालीका साथै पोखरा र भरतपुरमा रेन वाटर हार्वेस्टिङ तथा र ग्राउन्ड वाटर रिचार्ज परियोजना अगाडि सारेको हो ।
यी पानी भण्डारण परियोजना कम्पनीको २०३० जल सुरक्षा रणनीतिप्रतिको प्रतिबद्धताको समर्थन लक्षित रहेको बताइएको छ । कम्पनीले वाटरएड नेपालको प्राविधिक सहयोगमा सेन्टर फर इन्टिग्रेटेड अर्बन डेभलपमेन्ट (सीआईयूडी)सँग बाइसधारा–बालाजु पार्कमा रहेका सुकेका ढुंगेधाराहरूलाई पुनः प्रयोगमा ल्याउन मद्दत गर्न ग्राउन्ड वाटर रिचार्ज परियोजनाको लागि साझेदारी गरेको छ । परियोजनामा रिचार्ज ट्रेन्च (रेन गार्डेन), २१ ओटा रिचार्ज इनार, ढलान संरक्षण र सतह÷सतहभन्दा मुनि ड्रेनेजको काम समावेश छ ।
कम्पनीले स्प्लाश नेपालसँगको सहकार्यमा पोखराको सैनिक आवासीय महाविद्यालयमा खानेपानी र हात धुने स्टेशन स्थापना गरिनुको साथै रेन वाटर हार्वेस्टिङ प्रणाली सञ्चालन गर्ने जानकारी दिएको छ । त्यसैगरी भरतपुरका चारओटा सामुदायिक विद्यालयमा वर्षाको पानी संकलन प्रणाली स्थापना गरी विद्यालय जाने बालबालिकालाई स्वच्छ खानेपानी उपलब्ध गराउने बताइएको छ । काठमाडौंमा स्प्लास नेपालले बालाजु औद्योगिक क्षेत्रको चाइल्ड केयर फसिलिटीभित्र पिउने पानीको फिल्टर युनिट स्थापना गर्न सहयोग गरिने सम्झौतामा उल्लेख छ ।
पछिल्लो एक दशकमा, कोका–कोला बेभरेज नेपालले ८ ओटा वाटर स्टेवार्डशिप परियोजना पूरा गरेको जानकारी दिएको छ । यो वर्षमा पाइपलाइनका ४ परियोजनाहरू रहेको कम्पनीको भनाइ छ ।
कोका–कोला बेभरेज नेपालका प्रबन्ध निर्देशक जी दीपक सेन्थिलनाथले यी परियोजनाले जलवायू परिवर्तनबाट सबैभन्दा बढी प्रभावित भएका समुदाय, विशेष गरी महिलालाई सशक्तिकरण गर्ने, विद्यार्थीका लागि सुरक्षित पिउने पानीको पहुँच बढाउने र सबैको जीविकोपार्जनमा सुधार गर्ने सन्दर्भमा सामुदायिक दृढतालाई बढाउन केन्द्रित रहने बताए ।
