सर्वोत्तम सिमेन्ट र रिलायन्स स्पिनिङ मिल्सले आईपिओ निष्काशनको अनुमति माग गर्दै नेपाल धितोपत्र बोर्डमा आवेदन दिएका छन् । सर्वोत्तमले असार २८ र रिलायन्सले असार ३१ मा बोर्डमा आवेदन दिएका हुन् ।दुवै कम्पनीले बुक विल्डिङ विधिबाट आईपिओ निष्काशन गर्न लागेको हुन् । जस अनुसार उनीहरुले हाल योग्य संस्थागत लगानीकर्तालाई आईपिओ निष्काशनको लागि अनुमति माग गरेका हुन् । सर्बसाधारणमा निष्काशन गरिने शेयरको ४० प्रतिशत योग्य संस्थागत लगानीकर्तालाई छुट्याउनु पर्ने प्रावधान छ । सोहि अनुसार उनीहरुले पहिलो चरणमा योग्य संस्थागत लगानीकर्ताको लागि शेयर निष्काशनको अनुमति माग गरेका हुन् ।योग्य संस्थागत लगानीकर्ता सर्वोत्तम सिमेन्टले २४ लाख कित्ता शेयर निष्काशन गर्ने छ भने रिलायन्स स्पिनिंग मिल्सले ७ लाख ७० हजार ६ सय ४० कित्ता शेयर निष्काशन गर्ने छ । संगठित संस्थाले योग्य संस्थागत लगानीकर्ताबाट प्राप्त आशय मूल्यको अध्ययन गरी आधार मूल्य तय गर्नुपर्ने र उक्त आधार मूल्यमा २० प्रतिशत थप गर्दा कायम हुने मूल्य माथिल्लो सीमा र २० प्रतिशत घटाउदा कायम हुने मूल्य तल्लो सीमा हुने गरी मूल्य सीमा निर्धारण गर्नुपर्ने ब्यबस्था छ । योग्य संस्थागत लगानीकर्तालाई निष्काशित धितोपत्र पूर्ण रुपमा बिक्री हुदाँ कायम हुने मूल्य (कट अफ मूल्य) निर्धारण गरी कट अफ मूल्य र सो भन्दा माथिल्लो मूल्यमा कबोल गर्ने सबै आवेदनकर्ताहरुलाई माग बमोजिमको धितोपत्र कट अफ मूल्यमा बाँडफाँड गर्नुपर्ने ब्यबस्था छ । कट अफ मूल्यमा आवेदन गर्ने लगानीकर्तालाई माग बमोजिमको धितोपत्र बाँडफाँट गर्न नपुगेमा समानुपातिक रुपमा बाँडफाँट गर्नुपर्ने तथा बाँडफाँटमा नपरेको रकम बाँडफाँट भएको तीन कार्य दिनभित्र आर्जित व्याजसहित फिर्ता गर्नुपर्ने वा खाता फुकुवा गर्नुपर्ने छ ।सर्वसाधारण लगानीकर्तालाई कट अफ मूल्यमा १० प्रतिशत छुट दिई धितोपत्र निष्काशन गर्नुपर्ने छ । योग्य संस्थागत लगानीकर्तालाई निष्काशन गरिएको शेयर बाँडफाँड भए पछि कम्पनीले सर्बसाधारणलाई शेयर निष्काशन गर्ने छ । दुवै कम्पनीको शेयर निष्काशनको लागि ग्लोबल आईएमई क्यापिटल बिक्रि प्रबन्धक रहेको छ ।
.jpg)
