दुई दशकभन्दा लामो समयदेखि नै, जब काठमाडौं उपत्यकाका सडक–चोकहरूमा फोहोर थुप्रिन थाल्छ, तब मात्र यसको दिगो व्यवस्थापनका उपायबारे चर्चा चल्ने गर्छ । यसपालि पनि, स्थानीय तह निर्वाचनमा मतदान गर्न फोहोरको डंगुर छिचोल्दै जानुपर्ने स्थिति छ, दुर्गन्ध व्याप्त छ, संक्रमणको जोखिम पनि उत्तिकै । सहरी जनसंख्याको व्यापक वृद्धि र उपभोगमुखी जीवनशैलीले दिनानुदिन फोहोरको परिणाम बढाइरहेको छ । यसको व्यवस्थापनका लागि दीर्घकालीन पूर्वाधारहरूको पहिचान गर्दै योजना पनि बनाइएको छ, तर प्रभावकारी रूपमा काम हुन सकेको छैन ।
