ताप्लेजुङ । ताप्लेजुङको लेकाली बस्ती तोक्पेगोलाका समुदाय हिमपात छल्न औलतिर बसाइँ सरेका छन् । हिमपातको मौसम शुरू भएसँगै मिक्वाखोला गाउँपालिका–५ पापुङको तोक्पेगोलाका समुदाय हिमपात छल्न लौलतिर बसाइँ सरेका हुन् ।
तोक्पेगोला बस्ती नजिकका उच्च डाँडामा हिउँ पर्न थालेपछि त्यहाँका बासिन्दा न्यानो ठाउँ खोज्दै औलतिर बसाइँ सरेका हुन् । करिब तीन हजार ३०० मिटर उचाइमा रहेको बस्ती तोक्पेगोलाका बासिन्दा मौसमी बसाइँ सर्ने गर्दछन् । हाल बस्ती नजिक डाँडामा हिउँ पर्न थालेको र कात्तिक तेस्रो सातापछि तोक्पेगोला बस्ती रहेकै क्षेत्रमा हिउँ पर्ने भएकाले यहाँका बासिन्दा वर्षेनि मौसमी बसाइँ सर्ने गरेका छन् । गतवर्षको तुलनामा यस वर्ष चाँडै हिमपातसँगै चिसो शुरू भएको र दिनदिनै अत्यधिक चिसो बढ्न थालेपछि तोक्पेगोलाका बासिन्दा औलतिर बसाइँ सरेका मिक्वाखोला गाउँपालिका–५ पापुङका वडाध्यक्ष डण्डु लामाले बताए । तोक्पेगोलामा हाल १३ घरपरिवार बस्दै आएका छन् ।
तोक्पेगोलाका बासिन्दा चिसो छल्न पापुङकै तल्लो बस्तीमा मौसमी बसाइँ सरेको वडाध्यक्ष लामाले जानकारी दिए । हिमपात र चिसो छल्न हिमाली क्षेत्रदखि औल झरेका समुदाय करीब ६ महिनापछि तोक्पेगोला फर्कन्छन् । चिसो मौसम सकिएपछि वैशाखतिर मौसमी बसाइँ सरेका पुरानै ठाउँ तोक्पेगोलामा पुनः बसाइ सर्ने गरेको पापुङका वडा सदस्यसमेत रहेका स्थानीय पासाङ शेर्पाले बताए । तोक्पेगोलाका बासिन्दा अधिकांशको तल्लो औल क्षेत्रमा पनि आफ्नो जग्गा जमिन रहेको बताइएको छ । रासस
