काठमाडौं । अमेरिकी शर्ट सेलिङ कम्पनी हिन्डेनबर्ग रिसर्चले भारतीय व्यापारिक समूह अदानी ग्रुपमाथि लगाएको आरोपबारे छानबिन गर्ने भएको छ । कम्पनीले अदानी समूहमाथि शेयर चलखेल र वित्तीय अनियमितताको आरोप लगाएपछि समूहका शेयर रक्ताम्मे बनेका थिए ।
समूहले सर्वोच्च अदालतमा हिन्डेनबर्ग आरोपमाथि छानबिन गर्न याचिका नै दायर गरेको थियो । याचिकामा केन्द्र सरकारलाई एउटा समिति बनाएर अदानी ग्रुपमाथि हिन्डेनबर्ग रिसर्चको आरोपबारे छानबिन गर्न भनिएको थियो । याचिकामा सो समितिको अध्यक्षता सर्वोच्च अदालतका सेवा निवृत्त कुनै न्यायाधिसलाई गराउन समेत भनिएको छ । सर्वोच्च अदालतले शुक्रवार फेब्रुअरी १० मा यो याचिकाबारे सुनवाई गर्ने सहमति जनाएको छ ।
हिन्डनबर्ग रिसर्चको प्रतिवेदनमा भारतीय अर्बपति व्यापारी गौतम अदानीका कम्पनीहरूमाथि कर्पोरेट गभर्नेन्स र लेखासम्बन्धी कयौं ठगीको आरोप लगाइएको थियो । याचिकामा अदानी समूहका कम्पनीमाथि लागेका यी सबै आरोपको विस्तृत अनुसन्धान गरी वास्तविक अवस्था देशसामु राख्न माग गरिएको छ ।
अधिवक्ता विशाल तिवारीले यस सम्बन्धमा सर्वोच्च अदालतमा निवेदन दिएका थिए । अत्यावश्यक सूचीको रूपमा दायर गरिएको यो याचिका प्रधानन्यायाधीश डीवाई चन्द्रचुडको अध्यक्षतामा रहेको इजलासमा परेको छ । उनले हिन्डनबर्ग अनुसन्धानका आरोपहरूको छानबिन गर्न सर्वोच्च अदालतको बेन्चलाई शुक्रवार सुनुवाइ गर्न अनुरोध गरेका छन् ।
याचिकामा ठूला कम्पनीहरूको ५ अर्ब रुपया भन्दा बढी ऋण लिएको मामिलाहरुबारे छानबिन गर्न विशेष समिति बनाउन पनि भनिएको छ । हिन्डेनबर्गको रिपोर्ट सार्वजनिक भएयता ८ दिनसम्म ओर्लिएको अदानी समूहको शेयरमा यो हप्तादेखि सुधार देखिएको थियो । तर ग्लोबल इन्डेक्स प्रोभाइडर मोगर्न स्ट्यान्ली क्यापिटल इन्टरनेशनल (एमएससीआई)ले अदानी समूहका शेयरहरुको समीक्षा गर्ने बताएपछि बिहीवारको कारोबारमा अदानी समूहका शेयर दबाबमा आएका छन् । यो समीक्षामा एमएससीआईले अदानी समूहका सूचिकृत कम्पनीका फ्रि फ्लोट स्टेटसको समीक्षा गर्नेछ ।
एमएससीआईले समीक्षा गर्ने भनेर आफ्नो रिपोर्टलाई पूष्टि गरेको हिन्डेनबर्गका संस्थापक नाथन एन्डरसनले बताएका थिए । बिहीवार अदानी इन्टरप्राइजेजको शेयर ८ दशमलव २८ प्रतिशतले घटी प्रतिकित्ता १ हजार ९८० रुपयामा झरेको छ । अदानी पावर र अदानी ट्रान्समिशनको शेयरमा ५ प्रतिशतको कमी देखिएको छ । अन्य कम्पनीका शेयर पनि रातोमा छन् । एजेन्सी
