वैशाख ११, काठमाडौं । समता लघुवित्त वित्तीय संस्थाले चालू आर्थिक वर्षको तेस्रो त्रैमासिक वित्तीय विवरण शनिवार प्रकाशित गरेको छ ।
कम्पनीले सो अवधिसम्ममा रू. ६ करोड ६० लाख नाफा कमाएको छ । यो नाफा गत वर्षकोभन्दा ९५ दशमलव शून्य ३ प्रतिशत बढी हो । कम्पनीले गत वर्षको सो अवधिसम्ममा रू.३ करोड ३८ लाख नाफा कमाएको थियो ।
तेस्रो त्रैमाससम्ममा खुद ब्याज आम्दानी ६१ दशमलव ३० प्रतिशतले बढाएर रू. ११ करोड ६४ लाख पुर्याएको कम्पनीले गतवर्ष भने रू. ७ करोड २२ लाख खुद ब्याज आम्दानी गरेको थियो ।
कम्पनीले सञ्चालन नाफा पनि रू.५ करोड ३१ लाखबाट बढाएर रू.१० करोड ३७ लाख पुर्याएको छ। कम्पनीले उक्त अवधिसम्ममा रू. ८२ करोड ७० लाख निक्षेप संकलन गरेको छ भने रू.२ अर्ब २३ करोड लगानी गरेको छ ।
कम्पनीको चुक्तापूँजी रू.२२ करोड ९३ लाख रहेको उक्त कम्पनीको जगेडा कोषमा रू.१३ करोड ५० लाख रहेको छ । उक्त अवधिसम्ममा कम्पनीको निस्क्रिय कर्जा भने २ दशमलव ११ प्रतिशतबाट बढेर ३ दशमलव ७५ प्रतिशत पुगेको छ ।
कम्पनीको प्रतिशेयर आम्दानी ३८ रुपैयाँ ३८ पैसा र प्रतिशेयर नेटवर्थ १५८ रुपैयाँ ७६ पैसा रहेको छ । कम्पनीले घरेलु लघुवित्त वित्तीय संस्थालाई मर्ज गरेर गत वैशाख २ गतेबाट एकीकृत कारोबार गरिसकेको छ । दुवै मर्जर भएर घरेलु समता लघुवित्त वित्तीय संस्था भएको छ ।
तेस्रो त्रैमाससम्मको वित्तीय विवरण भने कम्पनीले साविककै कम्पनीको नामबाट सार्वजनिक गरेको छ । तर अहिले कानूनीरुपमा ती दुवै कम्पनीको बेग्लाबेग्लै अस्तित्व भने छैन ।
