म्याग्दी (अस) । म्याग्दीको बेनीमा सञ्चालित म्याग्दी बहुमुखी क्याम्पसमा सूचना तथा प्रविधिको विषयमा अध्यापन हुने भएको छ । क्याम्पसको स्नातक तहमा सेमेस्टर प्रणाली अन्तर्गत प्राविधिक शिक्षाको विषयमा अध्ययन–अध्यापन गराउन लागिएको हो ।
साविक धवलागिरिमै पहिलोपटक गुणस्तर सुनिश्चितता प्रत्यायन (क्यूएए) प्राप्त गरेको म्याग्दी क्याम्पसले सूचना तथा प्रविधिको क्षेत्रमा अध्यापन गराउने मौका पाएको हो । प्राविधिक शिक्षाका लागि ठूला शहर तथा विदेशमा जाने चलन बढिरहेको समयमा क्याम्पसले जिल्लामै स्नातक तहमा कम्प्युटर तथा सूचना, प्रविधि (बीआईसीटीई)को विषयमा शैक्षिक कार्यक्रम शुरू गर्ने भएको छ ।
जिल्लाका विभिन्न विद्यालयमा विज्ञान, गणित, कम्प्युटर जस्ता प्राविधिक विषय पढाउने शिक्षकको अभाव भइरहेको बेला म्याग्दी क्याम्पसले एकैपटक दुईओटा विषयको सम्बन्धन प्राप्त गरेको छ । बीआईसीटीई र बीएड साइन्स कार्यक्रमका लागि प्रवेश परीक्षाका लागि आवेदन खुलाइएको सहायक क्याम्पस प्रमुख श्रीधर सुवेदीले बताए ।
समेस्टर प्रणालीमा अध्ययन तथा अध्यापन हुने कम्प्युटर प्रविधिको विषयमा ४० प्रतिशत आन्तरिक तथा ६० प्रतिशत लिखित परीक्षा हुने सूचना अधिकारी समेत रहेका सहायक क्याम्पस प्रमुख सुवेदीले जानकारी दिए । बीआईसीटीई विषयमा अध्ययनका लागि यही फागुन १० गतेसम्म प्रवेश परीक्षाको आवदेन दिन सकिने समय तोकिएको छ । २०४८ सालमा स्थापित म्याग्दी बहुमुखी क्याम्पसमा स्नातकोत्तर तहसम्म विभिन्न विषयमा पढाइ हुँदै आएको छ । क्याम्पसमा १४ सय विद्यार्थीले अध्ययन गरिरहेका छन् ।
