१४ बीमा कम्पनीले बुझाउन सकेनन् पूँजी वृद्धिको योजना, बुझाउने मध्ये धेरैको रोजाइमा हकप्रद शेयर

वैशाख ११, काठमाडौं । बीमा समितिले तोकेको समयभित्र १४ ओटा बीमा कम्पनीले चुक्ता पूँजी वृद्धिको योजना बुझाउन असफल भएका छन् । समितिले दिएको ३० दिनको समय भित्र २४ ओटा बीमा कम्पनीहरूले मात्र पूँजी वृद्धिको योजना बीमा समिति समक्ष पेश गरेका छन् । समितिले ३० दिन भित्र पूँजी वृद्धिको योजना पेश गर्न चैत १० गते निर्देशन दिएको थियो । तर, उक्त अवधि वितिसक्ता समेत बाँकी १४ ओटा बीमा कम्पनीले पूँजीवृद्धि योजना समितिमा बुझाउन सकेका छैनन् । ३९ ओटा बीमा कम्पनीहरूमध्ये नेपाल लाइफ इन्स्योरेन्सको भने समितिले तोकेको चुक्तापूँजी भने पुगिसकेको छ ।    समितिका अनुसार वैशाख ११ गते आइतवारसम्म  २४ ओटा बीमा कम्पनीहरूले पूँजी वृद्धि योजना समितिमा बुझाएका हुन् । जसमा ११ ओटा जीवन बीमा कम्पनी छन् भने बाँकी १३ ओटा निर्जीवन बीमा कम्पनीले समितिमा पूँजीवृद्धि योजना बुझाएका हुन् । अधिकांश कम्पनीले हकप्रद शेयर जारी गरेर पूँजीवृद्धि गर्ने योजना समितिमा बुझाएका छन् । नयाँ बीमा कम्पनीहरूले मर्जरमा जाने नीति लिएर पनि समितिमा पूाजीवृद्धि योजना पेश गरेको समितिले जनाएको छ ।  यसअघि जीवन बीमा कम्पनीका लागि २ अर्ब र निर्जीवन बीमा कम्पनीका लागि १ अर्ब रूपैयाँ चुक्तापूँजी कायम गर्नु पर्ने व्यवस्था थियो । समितिले आगामी चैत मसान्तभित्र जीवन बीमा कम्पनीलाई ५ अर्ब र निर्जीवन बीमा कम्पनीलाई २ अर्ब ५० करोड रुपैयाँ चुक्तापूँजी कायम गर्नु पर्ने व्यवस्था गरेको छ ।  तोकिएको समयमा कम्पनीहरूले पूँजीवृद्धि योजना समितिमा पेश नगरे ऐनमा भएको व्यवस्था अनुसार कारबाही हुने समितिका कार्यकारी निर्देशक तथा प्रवक्ता राजुरमन पौडेलले जनाकारी दिए । समितिको योजना बीमा कम्पनीहरू घटाउने नै भएकोले उपयुक्त कम्पनी छनोट गरी एक अर्कामा मर्ज हुने गरी योजना ल्याउँन पनि भनिएको पौडेले बताए ।