‘आगामी वैशाखसम्ममा सबैलाई कोरोनाविरुद्ध खोपको पूर्ण मात्रा’

काठमाडौं (अस) । स्वास्थ्य तथा जनसंख्यामन्त्री विरोध खतिवडाले आगामी वैशाख मसान्तसम्ममा लक्षित जनसंख्याका सबैलाई कोभिड–१९ विरुद्धको खोपको पूर्ण मात्रा प्रदान गर्ने लक्ष्य रहेको बताएका छन् । मन्त्री भएको १०० दिन पुगेको अवसरमा शुक्रवार मन्त्रालयमा आयोजित पत्रकार सम्मेलनमा उनले सबैलाई कोभिड–१९ विरुद्धको खोपको पूर्ण मात्रा प्रदान गर्न आवश्यक पर्ने खोपको मौज्दात सुनिश्चित गरिसकिएको बताएका हुन् । १२ वर्षदेखि माथिका सबैलाई खोप लगाइने जानकारी उनले दिए ।  मन्त्री खतिवडाले कोरोना भाइरसविरुद्धको खोपको २४ लाख मात्रा नहराएको दाबी गरेका छन् । ‘खोपको २४ लाख मात्रा हराएको होइन, हामीले खोप लगाउन प्रदेश, जिल्ला, स्थानीय तह हुँदै टोलटोलमा स्वास्थ्यकर्मी खटाएका थियौं’, मन्त्री खतिवडाले भने, ‘टोलटोलमा गएर लगाएको तथ्यांक नआएको मात्र  हो ।’ खोप लगाउँदा केही मात्रा खेर गएकाले पनि तथ्यांक नमिलेको उनले बताए । ‘एउटा डब्बामा रहेको खोपको १० मध्ये आठ मात्रा लगाइयो र बाँकी दुई मात्रा खोप त्यही दिन लगाइन भने त्यो खेर जान्छ,’ उनले भने, ‘त्यसरी पनि खोपको मात्रा खेर गइरहेको छ ।’ हराएको खोपको सम्बन्धमा मन्त्रालयले प्रमुख विशेषज्ञ डा. गुणराज लोहनीको संयोजत्वमा पाँच सदस्यीय छानबिन समिति गठन गरेको र चाँडै नै हराएको खोपका बारेमा जानकारी दिने उनको भनाइ थियो । मन्त्री खतिवडाले ५–११ वर्ष उमेर समूहका बालबालिकालाई समेत कोभिड–१९ विरुद्धको खोप प्रदान गर्न खोपको उपलब्धता सुनिश्चितता भइसकेको बताए । हालसम्म चार करोड ६५ लाख ७० हजार ७२० खोपको मात्रा प्राप्त भइसकेमा तीन करोड ४८ लाख २५ हजार ६०१ मात्रा लगाइएको छ । मन्त्रालयले खोपको पहुँच नपुगेको स्थान र समुदायको पहिचान गरी प्रदेश र स्थानीय सरकारको नेतृत्वमा खोप अभियान सञ्चालन गरेको मन्त्री खतिवडाले जानकारी दिए । ‘ठूला अस्पतालमा र जनघनत्व बढी भएका सहरका विभिन्न सार्वजनिक स्थानमा खोप केन्द्र निर्धारण गरेर दैनिक रूपमा खोप प्रदान भइरहेको छ’, उनले भने । मन्त्री खतिवडाले आफ्नो सय दिनको कार्यकालको उपलब्धमा कोरोना भाइरसको पिसिआर परीक्षण शुल्क घटाएको उल्लेख गरे । यस्तै, कोरोना संक्रमितको उपचार व्यवस्थापनका लागि अक्सिजन प्लान्ट, अक्सिजन सिलिन्डर, सघन उपचार कक्ष, हाई डिपेडेन्सी युनिट शøयाको संख्या वृद्धि गरी अस्पतालको क्षमता वृद्धि गरिएको उनले बताए । साथै भारतसँग सिमाना जोडिएका प्रवेश विन्दुमा स्थापित हेल्थ डेस्कको क्षमता वृद्धि गरी दैनिक नेपाल प्रवेश गर्ने यात्रुमध्ये ९०५ को स्क्रिनिङ भएको र तीमध्ये ८७ ५ भन्दा बढीको कोभिड–१९ को परीक्षण भइरहेको मन्त्री खतिवडाले जानकारी दिए ।