काठमाडौं (अस) । एनएमबि बैंक र रेमिट हाइड्रोबीच ७७.५ मेगावाट क्षमताको ताप्लेजुङमा अवस्थित घुन्साखोला जलविद्युत् आयोजनामा लगानी गर्नेसम्बन्धी समझदारीपत्रमा हस्ताक्षर भएको छ । जनताको जलविद्युत् कार्यक्रममा समावेश घुन्साखोला जलविद्युत् आयोजना रेमिट हाइड्रोद्वारा प्रवद्र्घित कम्पनी हो ।
आयोजनामा रेमिट हाइड्रोको मुख्य लगानीकर्ता हाइड्रोइलेक्ट्रीसिटी इन्भेष्टमेन्ट एन्ड डेभलपमेन्ट कम्पनी तथा रेमिट्यान्सकर्ताको लगानी रहनेछ । एनएमबि बैंकले समझदारीपत्रमा हस्ताक्षरपछि अन्य बैंक तथा वित्तीय संस्थालाई सामेल गराई सह–वित्तीयकरण गठन गरी आयोजनाको वित्तीय व्यवस्थापन गरिनेछ ।
घुन्साखोला जलविद्युत् आयोजनाको कुल लागत १८ अर्ब २५ करोड रहेको छ । एनएमबि बैंकले हालसम्म ४६ जलविद्युत् आयोजनामा लगानी गरिसकेको छ । बैंकले वातावरणीय तथा सामाजिक नीति तयार पारी पर्यावरण तथा सामाजिक व्यवस्थापन प्रणाली लागू गरिएको बताएको छ । हाल बैंकले २०१ शाखा, १३८ एटीएम, ९ एक्सटेन्सन काउन्टरमार्फत बैंकिङ सेवा दिँदै आएको छ ।
