जेठ १६, बागलुङ । संघीय सरकारले बागलुङ जिल्लालाई ३ अर्ब ८७ करोड ७५ लाख रुपैयाँ बजेट विनियोजन गरेको छ ।
आर्थिक वर्ष २०७८/०७९ का लागि शनिवार अर्थमन्त्री विष्णु पौडेलले बजेट भाषण मार्फत बागलुङका दश स्थानीय पालिकालाई समान्यीकरण, सशर्त, विशेष र समपुरक अनुदान गरेर ३ अर्ब ८७ लाख ७५ हजार रुपैयाँ बजेट विनियोजित गरेको हुन् । अर्थमन्त्री पौडेलले बागलुङका पालिकालाई चालूतर्फ ३ अर्ब ५० करोड ८६ लाख र पूँजीगततर्फ ३६ करोड ८९ लाख रुपैयाँ बजेट विनियोजित गरेका छन् ।
चार ओटा नगरपालिकालाई २ अर्ब ४ करोड ४७ लाख रुपैयाँ र छ ओटा गाउँपालिकाहरुलाई १ अर्ब ८३ करोड २८ लाख रुपैयाँ बजेट विनियोजित भएको छ । बागलुङका चार ओटा नगरपालिका मध्ये सबैभन्दा धेरै बागलुङ नगरपालिकालाई ७४ करोड ७२ लाख र सबैभन्दा कम ढोरपाटन नगरपालिकालाई ३२ करोड ७० लाख रुपैयाँ बजेट विनियोजित भएको छ ।
यस्तै गाउँपालिका तर्फ सबैभन्दा धेरै काठेखोला गाउँपालिकालाई ४१ करोड ५८ लाख रुपैयाँ र सबैभन्दा कम तमानखोला गाउँपालिकालाई १७ करोड ९१ लाख रुपैयाँ विनियोजित गरिएको छ ।
विनियोजित बजेट अनुसार यस आर्थिक वर्षका लागि बागलुङ नगरपालिकामालाई ७४ करोड ७२ लाख रुपैयाँ, गलकोट नगरपालिकालाई ४७ करोड ४८ लाख रुपैयाँ, जैमिनी नगरपालिकालाई ४९ करोड ५७ लाख रुपैयाँ र ढोरपाटन नगरपालिकालाई ३२ करोड ७० लाख रुपैयाँ बजेट विनियोजित भएको छ ।
यस्तै गाउँपालिकातर्फ काठेखोला गाउँपालिकालाई ४१ करोड ५८ लाख रुपैयाँ, तमानखोला गाउँपालिकालाई १७ करोड ९१ लख रुपैयाँ, ताराखोला गाउँपालिकालाई २४ करोड ९२ लाख रुपैयाँ, निसीखोला गाउँपालिकालाई २८ करोड ८३ लाख रुपैयाँ, बडिगाड गाउँपालिकालाई ४४ करोड ६ लाख रुपैयाँ र बरेङ गाउँपालिकालाई २५ करोड ९८ लाख रुपैयाँ बजेट विनियोजित भएको छ ।
आर्थिक वर्ष २०७७/०७८ मा संघिय सरकारले बागलुङका लागि ३ अर्ब ५७ करोड ९८ लाख रुपैयाँ बजेट विनियोजित गरेको थियो ।
