विराटनगर (अस) । अन्तरराष्ट्रिय महिला दिवसको अवसरमा गत बुधवार मोरङ व्यापार संघको महिला उद्यम समिति र ई–सेवाको सहकार्यमा अनलाइन भुक्तानी सम्बन्धी कार्यक्रम आयोजना गरिएको छ । महिलाले आयआर्जन गरेको शीपलाई उद्यमशीलतामा परिवर्तित गरी आयआर्जनतर्फ उन्मुख गराउनु सो कार्यक्रमको प्रमुख उद्देश्य रहेको बताइएको छ । साथै व्यापार/व्यवसाय गर्ने सोच बनाएका र भर्खरै व्यापार व्यवसाय प्रारम्भ गरेका महिलालाई लक्षित गरी आआफ्नै व्यवसाय स्थल र घरबाटै आर्थिक कारोबार गर्न सहज बनाउने उद्देश्यले कार्यक्रम आयोजना गरिएको संघका अध्यक्ष नवीन रिजालले बताए ।
कार्यक्रमकी प्रमुख अतिथि प्रदेश १ की सामाजिक विकास मन्त्रालयकी राज्यमन्त्री विष्णु तुम्बाहाम्फेले राज्यको समग्र क्षेत्रमा महिलाको ३३ प्रतिशत सहभागिता रहनुपर्नेमा अहिले पनि अपेक्षित सहभागिता नभएको बताइन् । कार्यक्रममा महिलाले पनि पुरुष सरह राज्यका हरेक क्षेत्रमा सहकार्य तथा जिम्मेवारी वहन गर्न चाहेको उनले बताइन् । कार्यक्रममा ई–सेवा, विराटनगरका प्रमुख झलक सुब्बाले ई–सेवा नेपालकै पहिलो सेवाप्रदायक संस्था भएको भन्दै यसबाट जुनसुकै स्थानबाट पनि अनलाइन भुक्तानी सेवा लिन सकिने बताए । विशेषगरी महिलालाई लक्षित गरी उक्त कार्यक्रम आयोजना गरिएको उनको भनाइ छ ।
