हेटौंडा । सडक डिभिजन कार्यालय हेटौंडाले गत आर्थिक वर्ष २०७७/७८ मा बारा, पर्सा र मकवानपुर जिल्लामा आठओटा पक्की पुल निर्माण गरेको छ । ती जिल्लाको सवारीसाधन वारपार गर्न समस्या भएका स्थानमा पुल निर्माण गरेर सञ्चालनमा ल्याइएको कार्यालय प्रमुख खड्गलाल श्रेष्ठले जानकारी दिए ।
साथै संघीय सरकारअन्तर्गत रहेको उक्त कार्यालयले गत आवमै ३२ दशमलव ३६ किलोमिटर सडक कालोपत्र गरेको छ । त्यस्तै १९ दशमलव १० किमी सडक ग्राभेलसमेत गरेकोे छ । ती जिल्लामा कुल ३७ दशमलव ३५ किमी सडक मर्मत गरेको छ । राजमार्ग स्तरोन्नति तथा पुनःस्थापना कार्यक्रमअन्तर्गत २० दशमलव ६५ किलोमिटर र बोर्डअन्तर्गत १६ दशमलव ७० किलोमिटर रणनीतिक सडक मर्मत गरिएको कार्यालयका सूचना अधिकारी लोमस उपाध्यायले जानकारी दिए । कार्यालयको गत आव २०७७/७८ मा संशोधित बजेट रू. १ अर्ब ७० करोड रहेकोमा रू. १ अर्ब १६ करोड रुपैयाँ उक्त पूर्वाधार विकास निर्माणमा खर्च भएको उनले बताए । यसैबीच, हेटौंडा उपमहानगरपालिका–६ स्थित शान्तिटोलमा रू. १७ लाख लागतमा शान्तिटोल विकास संस्थाका लागि भवन निर्माण गरिएको छ । उपमहानगरपालिको रू. ७ लाख र विभिन्न संघसंस्था र व्यक्तिका सहयोगमा सो भवन निर्माण भएको संस्थाका अध्यक्ष केशव धितालले जानकारी दिए । रासस