महेन्द्रनगर । बैतडीकी १७ वर्षीया किशोरी भागरथी भट्टको बलात्कारपछि हत्यामा संलग्न रहेको आशंकामा एक व्यक्ति पक्राउ परेका छन् । घटनाको केही दिनपछि महेन्द्रनगर आएका ती व्यक्ति मंगलबार पक्राउ परेका हुन् ।
प्रहरीको निगरानीमा रहेका दोगडाकेदार गाउँपालिकाका उनी शिक्षक रहेको स्रोतको दाबी छ । यद्यपी पक्राउ बारे प्रहरीले कुनै जानकारी दिन चाहेको छैन ।
प्रहरीले घटनाको दिन र घटनापछि गाउँ छाड्नेको सूची तयार गरेर उनीहरुमाथि निगरानी बढाएको थियो । तीमध्ये केही व्यक्तिलाई प्रहरीले उच्च निगरानीमा पनि राखेको थियो ।
मंगलबार गृहमन्त्री रामबहादुर थापाले भागरथीका हत्यारा पक्राउ नजिक रहेको अभिव्यक्ति दिनुभएको थियो । यस्तै, प्रहरीले घटनाको सुक्ष्म अनुसन्धान भइरहेको जनाएको छ ।
गत माघ २१ बुधबार विद्यालय गएकी दोगडाकेदार–७ कतोलाकी भागरथीको अर्कोदिन बेलुका बलात्कारपछि हत्या गरिएको अवस्थामा घरनजिकै लबलेक सामुदायिक वनमा शव भेटिएको थियो ।
