नेपाल वायुसेवा निगमले ८ सय ८३ ओटा व्यापारिक संस्थालाई १ अर्ब ७ करोड १२ लाख रूपैयाँ तिर्न बाँकी रहेको महालेखा कार्यालयले बताएको छ । तीमध्ये रू. १० हजारभन्दा कम कारोबार गर्ने संस्था ४ सय १५ ओटा छन् । तिनीहरूको बक्यौता ११ लाख रूपैयाँमात्र रहेको गत चैत मसान्तमा सार्वजनिक महालेखा परीक्षकको प्रतिवेदनमा उल्लेख छ ।
निगमसँग व्यापारिक कारोबार गर्दा धरौटी राखेका कम्पनी बन्द भएपछि उठाउन बाँकी रहेको विवरण निगमले नदिएको र कारोबार रकम चुक्ता भएका कम्पनीको पनि लेखापरीक्षणमा उल्लेख नगरेका कारण निगमले उक्त रकम तिर्नुपर्ने देखिएको प्रतिवेदनले औंल्याएको छ । ‘पार्टीहरूलाई तिर्न बाँकी रहनाको कारण खुल्ने विवरण निगमसँग छैन,’ प्रतिवेदनमा भनिएको छ । तिर्न बाँकी रकमको यथार्थता यकिन गर्न छानबिन गर्नुपर्छ ।
निगमका नायब प्रबन्ध निर्देशक तथा प्रवक्ता राजुबहादर केसी नेवानिले तिर्न बाँकी रकम नभएको बताउँछन् । ‘कुनै पनि व्यापारिक संस्थाले निगमबाट लिनुपर्ने रकम वर्षौंसम्म छोडेका हुँदैनन्,’ उनले भने । व्यापारिक संस्थाहरूले निगमलाई तिर्नुपर्ने हिसाबमा आलटाल गर्ने तर आफूले लिन बाँकी हिसाब भने तुरुन्तै मिलाउने गरेको केसीको भनाइ छ । ‘लेखा विवरण राख्नमा त्रुटि भएको वा हिसाब राफसाफ नभएको हुन सक्छ,’ केसीले भने, ‘तर, त्यति ठूलो रकम निगमले तिर्न बाँकी नै छैन ।’
वर्ष ६, अंक २३०, शुक्रवार, २२ वैशाख, २०६९
