काठमाडौं । राष्ट्रिय सहकारी बैंक र अध्यक्ष केबी उप्रेतीलाई सहकारीका समस्यामा जोडेर सार्वजनिक भएका समाचारप्रति बैंकले ध्यानाकर्षण भएको बताएको छ । बुधवार एक विज्ञप्ति जारी गर्दै बैंकले संस्थागत सुशासनसहित सहकारी क्षेत्रको प्रवर्द्धन र विकासमा बैंक केन्द्रित रहँदै आएको स्पष्ट पारेको छ । सहकारीको संस्थागत विकास, वित्तीय व्यवस्थापन लगायत सहकारीको समग्र विकासमा सक्दो पहल, प्रयत्न र संयोजनकारी भूमिका निर्वाह गर्दै आएको बैंकको भनाइ छ ।
बैंकले भनेको छ, ‘समाचार र त्यसका आधारमा हुने गरेका चर्चाहरूको पछि नलाग्न तथा बैंकको बारेमा सत्यतथ्य बुझेर धारणा बनाउन आग्रह गर्दछौं ।’
एकीकरण हुनुभन्दा अगाडि पाँचओटा सहकारी संस्थामा बैंकले करीब १ अर्ब रुपैयाँ कर्जा लगानी गरेको विज्ञप्तिमा उल्लेख छ, ‘जसमा साविकको सदस्य संस्था– हाम्रो सगरमाथा बहुउद्देश्यीय सहकारी संस्था लिमिटेडमा बैंकको कर्जा रकम २८ करोड रुपैयाँमात्र रहेको जानकारी गराउँछौं,’ बैंकले भनेको छ । बैंकको नीति बमोजिम सबै सहकारीको एकल कर्जा सीमाभित्रै रहेको अवस्थामा एकीकरण भएका सबै संस्थाले लिएका कर्जाको कुल रकम बढी देखिएको बैंकले स्पष्ट पारेको छ ।
‘सहकारी विभागले सम्बन्धित संस्थाले नै बैंकको कर्जा सीमाभित्र ल्याउने योजनाका साथ एकीकरण गर्न अनुमति दिएको र बैंकको नीति अनुसार आगामी तीन वर्षभित्र एकीकृत संस्थाले कर्जालाई सीमाभित्र ल्याउनुपर्ने व्यवस्था रहेको छ,’ विज्ञप्तिमा उल्लेख छ । नेपाल राष्ट्र बैंक र सहकारी विभाग समेतको निर्देशन अनुसार आफ्ना सम्पूर्ण वित्तीय विवरण सार्वजनिक गर्दै आएको बैंकले बताएको छ ।
