वैशाख २, काठमाडौं । झुटा तथा नक्कली मूल्य अभिवृद्धि कर बिजक प्रयोग गरी राजस्व छली गरेको अभियोगमा न्यू राहुल मोवाइल सेन्टर सहित दुई ओटा फर्मविरुद्ध उच्च अदालतमा मुद्दा दायर भएको छ ।
उनीहरुबाट ३० करोड २८ लाख २ हजार ५७९ रुपैयाँ बिगो असुल गरी उक्त फर्महरुका कारोबार सञ्चालक र प्रोप्राइटर तथा बैंक खाता सञ्चालकहरुलाई जरिवाना र कैद मागदाबी गरिएको हो ।
चैत २५ र २६ गते उच्च अदालत जनकपुर, अस्थायी इजलास वीरगञ्ज र उच्च अदालत पाटन, हेटौंडा इजलासमा मुद्दा दर्ता गरिएको राजस्व अनुसन्धान विभागले जानकारी दिएको छ ।
मकवानपुर हेटौँडा उपमहानगरपालिका वडा नं. ५ बस्ने न्यू राहुल मोवाइल सेन्टरका प्रोपाइटर काजल केशरीबाट १२ करोड ३५ लाख २५ हजार २२ रुपैयाँ बिगो असुल गरी जरिवाना र कैद मागदाबी सहित चैत २६ गते उच्च अदालत पाटन, हेटौँडा इजलासमा मुद्दा दर्ता गरिएको हो ।
मालवस्तु खरीदको विवरण लुकाई छिपाई विक्री गर्दा समेत विजक जारी नगरी र गैर विजक (लुज विल) जारी गरी कानून विपरित छुट्टै खाता तयार गरी कारोबारलाई नदेखाई मूल्य अभिवृद्धि कर र आयकर समेतको राजस्व चुहावटको कसूर गरेको देखिएको विभागले बताएको छ ।
त्यस्तै, झुटा तथा नक्कली मुअकर विजक प्रयोग गरी राजस्व छली गर्ने वीरगञ्ज महानगरपालिका वडा नं. १२ रानीघाटका ब्याहुत ट्रेडर्स वीरगञ्जका प्रोप्राइटर अनिल कुमार कलवारबाट १७ करोड ९२ लाख ७७ हजार ५५१ रुपैयाँ विगो असुल गरी जरिवाना र कैद मागदावी सहित चैत २५ गते उच्च अदालत जनकपुरमा मुद्दा दर्ता गरिएको हो ।
ब्याहुत ट्रेडर्स वीरगन्जका प्रोप्राइटर अनिल कुमार कलवारले मालबस्तु गैर विजक (लुज विल) मार्फत हाईटेक इन्टरनेशनलसँग खरीद गरी उक्त मालवस्तु खरीदको विवरण लुकाई छिपाई विक्री गर्दा समेत विजक जारी नगरी कानून विपरित छुट्टै खाता तयार गरी कारोबारलाई नदेखाई गर्नुपर्ने भन्दा घटी कारोबार गरेको भन्ने गलत र झुटा विवरण पेश गरी मू.अ.कर मा दर्ता समेत नगरी मूल्य अभिवृद्धि कर र आयकर समेतको राजस्व चुहावटको कसूर गरेको विभागको आरोप छ ।
