काठमाडौं । नेप्से परिसूचक लगातार तीन दिन घटेको छ । तीन कारोबार दिनमा परिसूचक १ दशमलव ८८ प्रतिशत घटेको छ । केही समय देखि पर्ख र हेरको अवस्थामा लगानीकर्ता थिए । तर, आइतवार भने विक्रेता हाबी भएसँगै बजार तल झरको हो । लामो समयदेखि १९९० विन्दुभन्दा तल नझरेको नेप्से आइतवार भने उक्त सर्पोट विन्दुभन्दा तल झरेको हो ।
पछिल्लो समय धितोपत्रको दोस्रो बजार घटिरहेको समयमा सेबोनले धमाधम आइपीओ र हकप्रद शेयर जारी गर्न अनुमति दिइरहेको छ । यसले बजारमा आपूर्ति बढाउँदा बजार प्रभावित भएको लगानीकर्ताको भनाइ छ ।
बजार निरन्तर घटिरहँदा लगानीकर्ताको मनोबल कमजोर देखिएको छ । यसोत वित्तीय प्रणालीमा पर्याप्त लगानी योग्य रकम भए पनि कर्जाको माग नहुनु लाई कारण मानिएको छ भने महँगो ब्याजदरले गर्दा बजार प्रभावित भएको देखिन्छ ।
साताको पहिलो कारोबार दिन नेप्से परिसूचक १ दशलमव ४९ प्रतिशत घटेर १ हजार ९६० दशमलव ७८ विन्दुमा झरेको छ । २७६ धितोपत्रको ४० लाख ५३ हजार ३६८ कित्ता शेयर ३७ हजार ४१ पटकमा रू. १ अर्ब १८ करोड बराबरको शेयर कारोबार भएको हो ।
सेन्सेटिभ इन्डेक्स १ दशलमव ३३ प्रतिशत,फ्लोट इन्डेक्स १ दशमलव ४३ प्रतिशत र सेन्सेटिभ फ्लोट इन्डेक्स १ दशमलव ३३ प्रतिशत घटेको छ ।
कारोबारमा आएका धितोपत्रमध्ये थ्रि स्टार हाइड्रोपावरको शेयर मूल्यमा सकारात्मक सर्किट लागेको छ । शेयर मूल्य अघिल्लो कारोबार दिनको तुलनामा १० प्रतिशत बढेसँगै सकारात्मक सर्किट लागेको हो । शेयर मूल्य प्रतिकित्ता रू. २५४ दशमलव १० पुगेको हो । त्यस्तै दोस्रोमा सिक्लेस हाइड्रोपावरको शेयर मूल्य ५ दशलमव ५६ प्रतिशत बढेर रू. २५४ दशमलव ९० पुगेको छ ।
आइतवार सबैभन्दा बढी लिवर्टी इनर्जी कम्पनी र सिटी होटलका शेयरधनीले गुमाएका छन् । यी दुबै कम्पनीको शेयर मूल्य अघिल्लो कारोबार दिनको तुलनामा १० प्रतिशतका दरले घटेसँगै धेरै गुमाएका हुन । सिटी होटलको शेयर मूल्य रू. ६८० दशमलव ४० र लिवर्टी इनर्जीको रू.२०२ दशमलव ५० मा झरेको छ ।
सर्वाधिक शेयर खरीदविक्रीको हिस्सा सोल्टी होटलले ओगटेको छ । यस कम्पनीको रू.३ करोड ८८ लाख बराबर भएको छ। कम्पनीको शेयर मूल्य रू. ४३८ कायम भएको छ । त्यस्तै सर्वाधिक शेयर खरीदविक्री हुने दोस्रोमा आइएमई लाइफ इन्स्योरेन्सको रू. ३ करोड ७६ लाख बराबरको भएको हो ।
कारोबारमा आएका १३ओटै समूहगत परिसूचक घटेका छन् । सबैभन्दा बढी होटल तथा पर्यटन समूहको परिसूचक ३ दशलमव ०३ प्रतिशत घटेको छ । त्यस्तै हाइड्रोपावर समूहको २ दशमलव ३३ प्रतिशत , निर्जीवन र जीबन बीमा समूहको परिसूचक २ प्रतिशतका दरले घटेको हो । बजार कुल पूँजीकरण रू.२९ खर्ब ३५ अर्ब भन्दा बढी कायम भएको छ ।
