उत्पादनमूलक, कृषि र सेवा क्षेत्रका ४२ कम्पनीको ‘इकोसिस्टम’ विकास गर्ने सहमति

काठमाडौं । उत्पादनमूलक, कृषि र सेवा क्षेत्रसँग सम्बन्धित कम्पनीहरूको ‘इकोसिस्टम’ विकासका लागि दुईओटा संस्थाबीच सहमति भएको छ । नेपाल घरेलु तथा साना उद्योग महासंघ र नेपाल विकास अनुसन्धान प्रतिष्ठानबीच सहकार्यका लागि समझदारी भएको हो । सातओटै प्रदेशबाट उत्पादनमूलक, कृषि र सेवा क्षेत्रका दुई/दुईओटा गरी ४२ ओटा कम्पनी छनोट गरेर उक्त संख्याका कम्पनीको इकोसिस्टम विकास गर्न सहमति भएको महासंघले बताएको छ । आइतवार काठमाडौंमा यी दुई संस्थाले सोसम्बन्धी समझदारीपत्रमा हस्ताक्षर गरेका छन् । समझदारीअनुसार जिल्ला जिल्लामा गएर त्यहाँका साना तथा मझौला उद्योगीहरूसँग छलफल गरिने, उनीहरूका समस्या, बजार, मानव संसाधन, उत्पादनलगायत विषयमा अनुसन्धान गरिने नेपाल विकास अनुसन्धान प्रतिष्ठानका अध्यक्ष प्रा.डा. नवराज खतिवडाले बताए । उद्योग क्षेत्रमा देखिएका नयाँ प्रविधिहरू, मूल्य शृंखला र उद्योग प्रवर्द्धनका विषयमा पनि उद्यमीलाई जानकारी गराउने उनको भनाइ छ । यी क्षेत्रमा संलग्न कम्पनीहरूको विकास गरी सफल उद्यम बनाउन पाइलट परियोजना सञ्चालन गर्ने उद्देश्य छ । उत्पादनमूलक, कृषि र सेवा क्षेत्रका उद्यमीको इकोसिस्टम विकास गरी उत्पादकत्व बढाउन हाललाई कुनै निश्चित भौगोलिक क्षेत्रमा रहेका उद्योगहरूलाई छनोट गर्ने सहमति भएको छ । नेपाल घरेलु तथा साना उद्योग महासंघका पूर्वअध्यक्ष श्यामप्रसाद गिरीले अहिलेको अवस्थामा उद्योग व्यवसाय नै संकटमा पर्ने अवस्था आएको बताए । सरकार, दातृ निकाय र महासंघले दिने तालीम तथा अन्य सुविधाका विषयमा पनि समीक्षा हुनुपर्ने उनको भनाइ छ । उत्पादकत्व बढाउन सरकारी निकायहरू र राष्ट्रिय तथा अन्तरराष्ट्रिय संघसंस्थामा प्रतिष्ठान र महासंघले पहल गर्ने सहमति भएको छ । उत्पादनमूलक, कृषि, डिजिटल सेवा तथा अन्य क्षेत्रका उद्यमीको व्यवसाय विकास र प्रवर्द्धन गर्ने क्रममा दुवै पक्षले आफूसँग भएको विज्ञता, स्रोतसाधन र जनशक्ति परिचालन गर्नेछन् । अनुसन्धान, आवश्यक रणनीति निर्माणको नेतृत्व प्रतिष्ठानले गर्नेछ । आवश्यकता अनुसार संघ, प्रदेश र स्थानीय तहका तीनओटै सरकारसँग छलफल, लबिङ र नयाँ परियोजना प्राप्त गर्न वा भइरहेका परियोजनामा सहयोग जुटाउन संयुक्त पहल गरिने समेत सम्झौतामा उल्लेख छ ।