आईपीएलका खेलहरू निःशुल्क देखाएर विज्ञापनबाट अर्बाैं कमाउने दाउमा मुकेश अम्बानी

काठमाडौं । भारतीय अर्बपति व्यापारी मुकेश अम्बानीले इन्डियन प्रिमियर लिग (आईपीएल)का खेलहरू निःशुल्क देखाउने तयारी गरेका छन् । वाल्ट डिज्नी र एमाजन डटकमलाई चुनौती दिन अम्बानीले यस्तो योजना बनाइरहेको भन्दै स्थानीय सञ्चार माध्यमहरूले समाचार छापेका छन् । यस्तो भए आईपीएल हेर्न सब्सक्रिप्शन शुल्क तिर्नु पर्ने छैन ।  गएको वर्ष मात्रै अम्बानीको भायकम १८ ले सोनी कर्पोरेशनलाई पछाडि पार्दै २ खर्ब २० अर्ब भारतीय रुपया (२ अर्ब ७० करोड डलर)मा आईपीएलको मिडिया राइट्स किनेको थियो । भायकम १८ रिलायन्स इन्डष्ट्रिज र पारामल ग्लोबको ज्वाइन्ट भेञ्चर हो । ठूला स्ट्रिमिङ कम्पनीहरूलाई टक्कर दिनका लागि अम्बानीले यस्तो कदम चाल्न लागेको विश्लेषणहरू आइरहेका छन् । यसअघि आईपीएलको मिडिया राइट्स डिज्नीले किनेको थियो । डिज्नीले यो राइट्सलाई आफ्नो सब्सक्राइबर संख्या बढाउन प्रयोग गरेको थियो । तर, अम्बानीले यसलाई फरकरूपमा प्रयोग गर्दैछन् । पेड प्रडक्टभन्दा फ्रि सर्भिसहरूले भारतमा विज्ञापनमा धेरै कमाउने गरेको तथ्यांक छ ।  निःशुल्क आईपीएल देखाएर विज्ञापनको माध्यमबाट अर्बौं भारतीय रुपया कमाउने अम्बानीको दाउ छ । आईपीएलको निःशुल्क प्रशारण भए पनि इन्टरेटको खपत बढ्नेछ । यसले रिलायन्स जियोलाई फाइदा हुनेछ । अहिले जियोमा ५० करोड भन्दा धेरै प्रयोगकर्ता छन् । भायकम १८ का प्रयोगकर्ताहरूले इन्टरनेट चल्ने हरेक उपकरणमा बिना समय सीमा आईपीएल हेर्न पाउने बताइएको छ । आईपीएलको प्रसारण निःशुल्क बनाएर धेरैभन्दा धेरै दर्शकलाई तान्ने योजना पनि कम्पनीको छ । आईपीएल विश्वमा सबैभन्दा धेरैले हेर्ने खेल प्रतियोगितामा पर्दछ । आईपीएल मार्च ३१ मा शुरु हुनेछ । रिलायन्सले प्रतिस्पर्धात्मक मूल्यभन्दा कममा इन्टरनेट सेवा उपलब्ध गराएर भारतको इन्टरनेट उद्योगमा नयाँ क्रान्ति ल्याएको थियो । पाँच वर्षसम्म आईपीएलको मिडिया राइट्स सित्तैमा देखाएर भायकम १८ ले पैसा कमाउने अनुमान गरिएको छ । झन्डै ८ हप्तासम्म चल्ने आईपीएल ५५ करोड मानिसले हेर्ने अनुमान छ । एजेन्सी