जेठ १०, काठमाडौं । ललितपुर महानगरपालिकामा नेपाली कांग्रेसका उम्मेदवार चिरीबाबु महर्जन मेयरमा फेरि निर्वाचित भएका छन् ।
उनले ४२ हजार ७२२ मत प्राप्त गरेका छन् । उनका निकटतम हरिकृष्ण व्यञ्जनकारले २४ हजार ५६० मत प्राप्त गरेका छन् । यसैगरी उपमेयरमा नेकपा (एमाले) की मन्जली शाक्य बज्राचार्यले २५ हजार ८४ मतसहित निर्वाचित भएकी छन् ।
उनले सत्ता गठबन्धनबाट उठेका नेकपा(माओवादी केन्द्र) का बाबुराज बज्रचार्यलाई ६ हजार ३३२ मतान्तरले पारजित गरेकी हुन् । बज्राचार्यले १८ हजार ७५२ मत प्राप्त गरेका छन् ।
मेयरमा दोस्रो कार्यकालको लागि निर्वाचित भएपछि सञ्चारकर्मीसँग कुरा गर्दै नवनिर्वाचित महर्जनले पहिलो कार्यकालका अधूरा काम सम्पन्न गर्दै नयाँ योजनाहरु पनि कार्यान्वयनमा ल्याउने बताएका छन्।
