हवाना । क्युबाका राष्ट्रपति मिगेल डायाज–कनेलले आफ्नो देश क्युबालाई आतङ्कवादीलाई प्रश्रय दिने मुलुकको सूचीमा राखेकामा संयुक्त राज्य अमेरिकाको निन्दा एवम् भत्र्सना गरेका छन् ।
राष्ट्रपति मिगेलले मङ्गलबार ट्विट गर्दै क्युबाले जहिल्यै आतङ्कवादको विरोध गरिआएको र क्युबा अनावश्यक रूपमा दण्डित भएको बताउनुभयो । उहाँले क्युबा कहिल्यै पनि आतङ्कवादलाई प्रश्रय दिने मुलुक नरहेको पनि बताए ।
अमेरिकी राष्ट्रपति डोनाल्ड ट्रम्पको कार्यकालमा क्युबामाथि सत्रुतापूर्व व्यवहार गरिएको बताउँदै राष्ट्रपति मिगेलले आगामी बाइडेन प्रशासनमा दुबै मुलुकबिचको सम्बन्धमा सुधार हुने विश्वास व्यक्त गरे ।
अमेरिकी विदेशमन्त्री माइक पोम्पेओले क्युबालाई आतङ्कवादलाई प्रश्रय दिने मुलुकको सूचीमा राखेको घोषणा गरेलगत्तै क्युबाली राष्ट्रपति मिगेलले यस्तो प्रतिक्रिया दिएका हुन् ।
क्युबालाई १९८२ मा अमेरिकाले आतङ्कवादलाई प्रोत्साहन गर्ने मुलुकको सूचीमा राखेको थियो । २०१५ मा बाराक ओबामा प्रशासनले उक्त प्रतिबन्ध फुकुवा गरेको थियो । तर, राष्ट्रपति ट्रम्पले क्युबाबाट अमेरिकालाई खतरा अझै रहेको भन्दै कडा आर्थिक प्रतिबन्ध घोषणा गरेका थिए । (रासस/सिन्ह्वा)
