नयाँ सारथी लघुवित्त वित्तीय संस्थाले बोलायो चैत २८  साधारण सभा, बुक क्लोज कहिले ?

काठमाडौं । नयाँ सारथी लघुवित्त वित्तीय संस्था लिमिटेडले चैत २८ गते चौधौं वार्षिक साधारण सभा बोलाएको छ । सभा होटल जुगल मिरावल चोक धुलिखेल काभ्रेपलाञ्चोकमा दिउँसो १ बजे शुरू गर्ने कम्पनीले जानकारी दिएको हो । सभाले गत आर्थिक वर्षको वार्षिक प्रतिवेदनउपर छलफल गरी पारित गर्नुका साथै प्रस्तावित लाभांशलाई अन्तिम स्वीकृति प्रदान गर्नेछ । कम्पनीले गत आर्थिक वर्षको मुनाफाबाट शेयरधनीलाई १९ प्रतिशत बोनस शेयर र कर प्रयोजनको लागि १ प्रतिशत नगद लाभांश वितरण गर्ने प्रस्ताव गरेको हो ।  त्यस्तै सभाले थप सार्वजनिक निष्कासन र बोनस शेयर वितरणपश्चात् कम्पनीको पूँजी वृद्धि हुने भएकाले पूँजी वृद्धिलगायत विषयमा प्रबन्धपत्र नियमावलीमा संशोधन गर्ने सम्बन्धमा पनि छलफल गर्नेछ । साथै सभाले विजय लघुवित्तसँग एक बराबर एक अनुपातमा मर्ज हुनुपूर्व गर्नुपर्ने सम्पूणर् कार्य गर्न सञ्चालक समितिलाई अख्तियारी दिने, मर्जरपश्चात् विजय लघुवित्तको नामबाट कारोबार गर्ने, प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने, लेखापरीक्षक नियुक्त गर्नेलगायत प्रस्तावहरू पारित गर्नेछ । साधारण सभा तथा लाभांश वितरण प्रयोजनको लागि कम्पनीले चैत १५ गतेदेखि २८ गतेसम्म बुक क्लोज गर्ने भएको छ । यसको आधारमा चैत १४ गतेसम्म कायम शेयरधनीमात्र साधारण सभामा भाग लिन र लाभांश पाउन योग्य हुनेछन् ।