फागुन १९, सिन्धुपाल्चोक । केहि समय अघि मेलम्चीमा आएको बाढीबाट प्रभावित हेलम्बुका स्थानीयले यथाशिघ्र सुरक्षित स्थानमा बास र आयआर्जनको कार्यक्रम लागू गरे मेलम्चीको पानी काठमाडौं पठाउन तयार रहेको बताएका छन् ।
हेलम्बु बाढीपिडीत संरक्षण तथा समन्वय समितिले हेलम्बु गाउँपालिका– ४ चिलाउनेघारीमा आयोजना गरेको सरोकारवाला बीचको अन्तरक्रियामा उनीहरुले यस्तो माग गरेका हुन् ।
बाढी प्रभावित अधिकांशले घर बनाउन जग्गासमेत नभएकाले जग्गा र स्थायी वा अस्थायी घर र आयआर्जनको कार्यक्रमको समेत माग गरेका छन् । हेलम्बु चनौटेका बुद्धराम तामाङले ५ लाख रुपैयाँमा घर बनाउन नसकिने भन्दै रकम थप गर्न आग्रह गरे ।
त्यस्तै इचोक घर भइ गणेशेबगरमा बसेकी रामप्रित लामाले आफ्नो भएजति सबै सम्पती बाढीले बगाएको भन्दै स्थानीय सरकारले चासो दिएपनि प्रदेश र केन्द्र सरकारले चासो कम दिएको गुनासो गरिन् ।
उनले आफुहरु मेलम्चीको पानी काठमाडौं पठाउन सदैब तयार रहेको र मेलम्ची खानेपानी आयोजनाले पनि सरकारसँग समन्वय गरी बाढीपीडितको चित्त बुझाउनु पर्ने बताइन् ।
त्यस्तै स्थानीय शिक्षक भिम कार्की, मेलम्ची भ्याली क्याम्पसका अध्यक्ष दिपक लामिछाने, समाजसेवी शिवप्रसाद लामिछाने लगायतले बाढीपिडीतहरु राजनैतिक रुपमा विभाजित नभई एकजुट भएर विद्यालय, बाँकी रहेका घरखेत संरक्षण गर्न र स्थायी आवास पुनर्निर्माणमा जुट्नु पर्नेमा जोड दिएका थिए ।
कार्यक्रममा मेलम्ची खानेपानी विकास समितिका वरिष्ठ प्रशासन सहायक धर्मराज देवकोटाले खोला नियन्त्रणका लागि अल्पकालिन रुपमा ३० करोड रुपैयाँ र सडकको लागि २५ करोड रुपैयाँ बजेट विनियोजन भइसकेको भन्दै यथाशिघ्र सम्झौता गरी बाँकी बस्ती संरक्षण र बाटोको काम सुरु गर्न हेलम्बु गाउँपालिकालाई अनुरोध गरे ।
उनले वैकल्पिक बाटोको लागि पनि थप बजेट विनियोजन भएको बताउँदै मेलम्ची अम्बाथान सडकको लागि ७५ करोड रुपैयाँ प्रस्ताव पेश गरिएको पनि जानकारी दिए ।
हेलम्बु गाउँपालिकाका अध्यक्ष निमा ग्यालजेन शेर्पाले बाढी प्रभावितहरुले ५ लाख रुपैयाँले घर निर्माण गर्न सम्भव नभएको भन्दै रकम थप गर्न आग्रह गरे । मेलम्चीमा आएको बाढीबाट हेलम्बु गाउँपालिकाको मात्रै ३०८ घरधुरी लाभग्राही कायम भएको र चाडैं सम्झौता गरी पुनर्निर्माण शुरु गरिने बताए । साथै बाढी प्रभावित १२५ घरधुरीको अस्थायी आवास निर्माण भइसकेको पनि उनले बताए ।
