काठमाडौं । आरएसडिसी लघुवित्त वित्तीय संस्था लिमिटेडले गत आर्थिक वर्ष (आव)को चौथो त्रैमाससम्म ११ करोड १६ लाख रुपैयाँभन्दा बढी खुद नाफा गरेको छ ।
अघिल्लो आवको चौथो त्रैमाससम्मको तुलनामा गत आवमा कम्पनीको खुद नाफा ५ दशमलव ७१ प्रतिशत बढी भएको हो । अघिल्लो आवको यस अवधिसम्म कम्पनीले १० करोड ५६ लाख रुपैयाँभन्दा बढी खुद नाफा गरेको थियो ।
गत आवमा कम्पनीको सञ्चालन नाफा ५ दशमलव ८८ प्रतिशत वृद्धि भएको छ । अघिल्लो आवमा १५ करोड ४ लाख रुपैयाँभन्दा बढी सञ्चालन नाफा गरेको कम्पनीले गत आवमा १५ करोड ९२ लाख रुपैयाँभन्दा बढी सञ्चालन नाफा गरेको हो ।
चौथो त्रैमाससम्म कम्पनीको वितरणयोग्य नाफा भने ८ करोड ८ लाख रुपैयाँभन्दा बढी कायम भएको छ ।
८ प्रतिशत बोनस शेयरमार्फत पूँजी बढाएर ८६ करोड ९५ लाख ६८ हजार कायम गरेको कम्पनीको रिटर्न अर्निङ ८ करोड ८४ लाख रुपैयाँभन्दा बढी छ । जगेडा कोष रकम भने यस अवधिसम्म ११ करोड ५५ लाख रुपैयाँभन्दा बढी छ ।
कम्पनीले गत आवमा अघिल्लो आवभन्दा २५ दशमलव ३७ प्रतिशत बढी ५ अर्ब ८२ करोड ६२ लाख रुपैयाँ निक्षेप संकलन गरेको छ भने विभिन्न लघुवित्त र सहकारीहरूलाई गत वर्षभन्दा २४ दशमलव ४४ प्रतिशत बढी ६ अर्ब ७२ करोड १७ लाख कर्जा सापटी दिएको छ ।
सदस्यहरूमा भने कम्पनीले ७८ लाख ३९ हजार कर्जा प्रवाह गरेको छ । गत आवमा कम्पनीको निष्क्रिय कर्जा बढेको छ । अघिल्लो आवमा शून्य दशमलव ४९ रहेको निष्क्रिय कर्जा गत आवमा १ दशमलव २२ प्रतिशत पुगेको छ । प्रतिशेयर आम्दानी १२ रुपैयाँ ८४ पैसा रहेको कम्पनीको प्रतिशेयर नेटवर्थ १२३ रुपैयाँ ४६ पैसा छ ।
रिपोर्ट हेर्न यहाँ क्लिक गर्नुहोला
