जेठ ३, काठमाडौं । बीमा समितिले प्राइम लाइफ इन्स्योरेन्स, गुराँस लाइफ इन्स्योरेन्स र युनियन लाइफ इन्स्योरेन्स कम्पनीलाई एकापसमा गाभ्न/ गाभिनका लागि मंगलवार सैद्धान्तिक सहमति दिएको छ ।
ती तीन ओटा जीवन बीमा कम्पनीले एकापसमा गाभिनका लागि गत वैशाख २९ गते समझदारी पत्र (एमओयू) मा हस्ताक्षर गरेका थिए ।
एमओयूको पत्रसहित तीनै ओटा कम्पनीका प्रतिनिधि सैद्धान्तिक सहमतिका लागि बीमा समिति पुगेका थिए । समितिले मंगललार नै ती कम्पनीलाई मर्जरको सैद्धान्तिक सहमति दिएको हो ।
समितिका अनुसार ‘बीमक गाभ्ने/गाभिने तथा प्राप्ति गर्ने सम्बन्धी निर्देशिका, २०७६’ को दफा ६ बमोजिम ती कम्पनीहरूलाई एकापसमा गाभ्न / गाभिनका लागि सैद्धान्तिक सहमति दिइएको हो ।
‘सोही निर्देशिकाको दफा ७ बमोजिम मूल्याङ्कनकर्ता नियुक्त गरी समितिमा विवरण पेश गर्नसमेत निर्देशन दिइएको छ,’ विज्ञप्तिमा भनिएको छ, ‘ती कम्पनीहरूले आफूहरूबीच आपसमा गाभ्ने/ गाभिने र प्राप्ति गर्ने सहमति भएको जानकारी दिंदै त्यसका लागि संयुक्त रूपमा निवेदन दिई सहमति माग गरेकाले समितिले त्यस सम्बन्धमा आज सैद्धान्तिक सहमति प्रदान गरेको हो ।’
