काठमाडौं । साविका प्राइम लाइफ इन्स्योरेन्स, युनियन लाइफ इन्स्योरेन्स र गुराँस लाइफ इन्स्योरेन्सबाट विभिन्न समयमा बीमा गराई व्यतित भएका बीमालेखहरूमा छूटको व्यवस्था गरिएको छ । कम्पनीले व्यतित बीमालेखहरू असोज १० देखि २६ गतेसम्म नविकरण तथा पुन:जागरण गर्दा लाग्ने ब्याज तथा जरिवानामा छूट गर्ने भएको हो । ३ वर्षसम्म व्यतित भएका बीमालेखमा ब्याज जरिवानामा शत प्रतिशत छूट गर्ने कम्पनीले जानकारी दिएको छ ।
त्यस्तै ३ वर्षभन्दा माथि ७ वर्षसम्म व्यतित बीमालेखमा ब्याज जरिवानामा ५० प्रतिशत र ७ वर्षभन्दा माथि जतिसुकै अवधिको व्यतित बीमालेखमा ब्याज जरिवानामा २५ प्रतिशत छूट गर्ने निर्णय कम्पनीले गरेको हो । यस किसिमको व्यतित बीमालेख पुन:जागरण गर्दा दिइएको छूट सुविधा बीमा अवधिभर एकपटक मात्र प्रदान गरिने कम्पनीको भनाइ छ ।
कम्पनीबाट ब्याज जरिवाना छूट सुविधाको उपयोग गरी नविकरण गराइएका बीमालेखहरू नविकरण भएको मितिले दुई वर्षभित्र बीमित तथा प्रस्तावकहरूले नियमानुसार समर्पण गर्न चाहेमा बीमालेख नविकरण गर्दा छूट प्रदान गरिएको ब्याज जरिवाना बापतको रकम कम्पनीबाट कट्टा गरिनेछ ।
