पशुप्रति हुने निर्दयी व्यवहार रोक्नका लागि सरकारले समिति गठन गरी काम कर्तव्य र अधिकार तोकेको छ । कृषि तथा पशु पन्छी मन्त्रालयले पशु सेवा विभागका महानिर्देशकको अध्यक्ष रहने गरि समिति गठन गरेको हो । समितिको सदस्यहरुमा सङ्घीय मामिला तथा सामान्य प्रशासन मन्त्रालयका उपसचिवस्तरका १ जना प्रतिनिधि, संस्कृति, पर्यटन तथा नागरिक उड्डयन मन्त्रालयका उपसचिवस्तरका १ जना प्रतिनिधि, गृह मन्त्रालयका उपसचिवस्तरका १ जना प्रतिनिधि , पशु स्वास्थ्य महाशाखाका उपसचिवस्तरका १ जना प्रतिनिधि, गुठी संस्थानका उपसचिवस्तरका १ जना प्रतिनिधि, पशु कल्याणको क्षेत्रमा उल्लेख्य योगदान पुर्याउने व्यक्तिहरू मध्येबाट मन्त्रालयले तोकेको १ जना प्रतिनिधि, र पशु कल्याणको क्षेत्रमा कार्यरत संघ/संस्थाहरूमध्येबाट मन्त्रालयले तोकेको १ जना प्रतिनिधि रहने छन् । समितिको सदस्य सचिवमा पशु सेवा विभागको महानिर्देशकले तोकेको वरिष्ठ प्राविधिक अधिकृत हुने ब्यबस्था रहेको छ । समितिको सचिवालय पशु सेवा विभागमा रहेको छ । यस समितिले निम्न ६ काम गर्न छ :१. पशुप्रति हुने निर्दयी व्यवहार रोक्न तथा पशु कल्याणसँग सम्बन्धित उपयुक्त नीति निर्माण गर्न मन्त्रालयमा सुझाव पेश गर्ने, २. पशुप्रति हुने निर्दयी व्यवहार रोक्ने तथा पशु कल्याणसँग सम्बन्धित उपयुक्त कार्यक्रम पहिचान तथा कार्यान्वयन गर्ने, गराउने,३. पशुप्रति हुने निर्दयी व्यवहार निरूत्साहन गर्न प्रदेश तथा स्थानीय तहका निकायहरूबीच समन्वय गर्ने, गराउने, ४. पशु कल्याण सम्बन्धी विषयमा जनचेतना अभिवृद्धि गर्न सरकारी तथा गैर सरकारी संघ/संस्था तथा नागरिक समाजसँग सहकार्य गर्ने, ५. पशु कल्याणसँग सम्बन्धित कार्य गर्ने गैर सरकारी संस्थाहरूको लागि आचार सहिंता तयार गरी कार्यान्वयन गर्ने, गराउने, ६. आवश्यकता अनुसार कार्यदल गठन गरी कार्य सञ्चालन गर्ने, गराउने।
