भदौ २७, काठमाडौं । राष्ट्रिय बीमा संस्थानले विगत तीन ओटा आर्थिक वर्षको साधारण सभा शनिवार सम्पन्न गरेको छ ।
कम्पनीले आर्थिक वर्ष ०६६/ ६७, ०६७/ ६८ र ०६८/ ६९ को वार्षिक प्रतिवेदनसहितका वित्तीय विवरण पारितका लागि शनिवार ३१औं वार्षिक साधारण सभा सम्पन्न आयोजना गरेको हो ।
सर्वसाधारणका लागि आईपीओ जारी गरी बोनस तथा हकप्रद शेयर मार्फत रू. २ अर्ब चुक्तापूँजी कायम गर्ने योजना साथ अघि बढेको संस्थानले समयमै साधारण सभा गर्न नसक्दा पूँजी वृद्धि अभियान अन्योलमा परेको हो । संस्थानले लामो समयदेखि बाँकी रहेको आर्थिक वर्ष ०६६/ ६७, ०६७/ ६८ र ०६८/ ६९ को वार्षिक लेखापरिक्षण सम्पन्न गरी साधारण सभा मार्फत पारित गराएका हो ।
संस्थानका प्रशासक कवि प्रसाद पाठकले पुराना हिसावकितावको तथ्याङ्क व्यवस्थित नभएको र कतिपय अभिलेखनै नष्ट गरेका कारण पुराना आर्थिक वर्षको लेखा परिक्षण हुन ढिलाइ भएको जानकारी दिए ।
अब संस्थानको वित्तीय व्यवस्थान डिजिटल प्रविधिबाट गरिने जानकारी दिदैं आगामी दिनमा यो समस्या नदोहोरिने विश्वास व्यक्त गरे । उनले बाँकी आर्थिक वर्षको साधारण सभा समेत यसै आर्थिक वर्षभित्र सम्पन्न गरी संस्थानले पूँजी वृद्धिको अभियान अघि बढाउने बताए ।
आर्थिक वर्ष ०६९/ ७०, ०७०/ ७१ र ०७१/ ७२ को लेखापरिक्षण सम्पन्न गरी स्वीकृतिका लागि बीमा समितिमा गत असार मसान्तमै पेश भइसकेको र आर्थिक वर्ष ०७२/ ७३, ०७३/ ७४ र ०७४/ ७५ को लेखापरिक्षण समेत समयमै सम्पन्न गर्ने योजना संस्थानको रहेको प्रशासक पाठकले जानकारी दिए ।
शनिवार सम्पन्न सभाले आर्थिक वर्ष ०७२/ ७३, ०७३/ ७४ र ०७४/ ७५ को लेखापरिक्षणका लागि लेखापरिक्षकद्वय केशव प्रसाद न्यौपाने र नन्दकिशोर शर्मालाई नियुक्त गर्ने निर्णयसमेत गरेको छ ।
हाल संस्थानको चुक्तापूँजी रू. रू. १८ करोड १० लाख २० हजार रहेको छ । यो पूँजी वृद्धि गरी बीमा समितिको निर्देशन बमोजिम संस्थानले रू. २ अर्ब कायम गर्नुपर्नेछ ।
