काठमाडौं । पाकिस्तानको विदेशी मुद्रा सञ्चिति सुक्ने क्रम जारी छ । त्यहाँको केन्द्रीय बैंक ‘स्टेट बैंक अफ पाकिस्तान’ (SBP)का अनुसार विदेशी मुद्रा सञ्चिति ६० लाख डलरले घटेको छ ।
गत अप्रिल २८ मा सकिएको हप्तामा पाकिस्तानी केन्द्रीय बैंकको कुल विदेशी मुद्रा सञ्चिति (Forex) लगभग ४ अर्ब ५० करोड डलर थियो । यो अघिल्लो हप्ताको भन्दा ६० लाख डलर कम भएको एसबीपीले बिहीवार विज्ञप्ति जारी गर्दै बताएको हो ।
वाणिज्य बैंकहरूसँग रहेको खुद विदेशी सञ्चिति करिब ५ अर्ब ६ करोड डलर पुगेको पनि बताइएको छ । एसबीपीका अनुसार पाकिस्तानसँग केन्द्रीय बैंक र वाणिज्य बैंकहरूसँग समेत गरेर कुल तरल विदेशी मुद्रा सञ्चिति (Liquid Foreign Reserves) करिब १० अर्ब डलर आसपास छ । विगत कयौं महीनायता पाकिस्तानको विदेशी मुद्रा सञ्चिति घटिरहेको छ । एजेन्सी
