सोलुुखुम्बुको एक मात्र सोलुदूधकुण्ड नगरपालिकालाई साक्षर नगरपालिका घोषणा गरिएको छ । कुल जनसंख्याको ९५ प्रतिशत भन्दा बढी साक्षर भएको क्षेत्रलाई साक्षर क्षेत्र घोषणा गर्न मिल्ने व्यवस्था अनुरुप नगरपालिकालाई नगरपालिकाका मेयर नाम्गेलजाङ्बु शेर्पाले साक्षर नगरपालिका घोषणा गर्नुभएको हो ।
नगरपालिकाको कुल जनसंख्या २४ हजार ३२३ मध्ये गत वर्ष सर्वेक्षण गर्दा एक हजार ३१२ जना निरक्षर भएको पाइएको थियो । निरक्षरलाई साक्षरता कक्षा सञ्चालन गरी ५६१ जना साक्षर बनाई करिब कुल जनसंख्याको ९६.९२ प्रतिशत साक्षर भएपछि साक्षर नगर घोषणा गरिएको मेयर शेर्पाले बताउनुभयो ।
मेयर शेर्पाले सबै नागरिक साक्षर नभएकाले आगामी दिनमा साक्षरता कक्षा सञ्चालन गरी सबै नागरिक साक्षर बनाउन पहल गर्ने बताउनुभयो । नेपाल सरकारको साक्षर गाउँपालिका, नगरपालिका तथा जिल्लाको घोषणाका लागि तयार गरिएको अनौपचारिक शिक्षा तथा साक्षरता कार्यक्रम कार्यान्वयन सहजीकरण पुस्तिका २०७५ अनुसार साक्षर नगरपालिका घोषणा गरिएको हो ।
