मनाङ । मनाङमा कोरोना संक्रमितको संख्या बढ्न थालेपछि स्थानीय तहले अस्पताल निर्माणलाई तीव्र बनाएका छन् । मनाङको चामे गाउँपालिकाका ११ जनामा संक्रमण देखिएपछि गाउँपालिकाले १५ लाखको लगानीमा १० शय्याको अस्थायी कोभिड अस्पताल निर्माण गरेको छ ।
०७२ को भूकम्पले जीर्ण भएको जिल्ला अस्पतालको पुरानो भवनमा पर्याप्त ठाउँ नहुँदा उपचारमा कठिनाइ झेल्दै आएका यहाँका सर्वसाधारणले अब भने सहज रूपमा उपचार पाउने भएका छन् । प्रदेश सरकारको १९ करोड लगानीमा जिल्ला अस्पतालको नयाँ भवनको निर्माणकार्य भइरहेको हुँदा गाउँपालिकाले जिल्ला खेलकुदको कभर्ड हललाई अस्थायी कोभिड अस्पतालको रूपमा प्रयोग गरेको पालिका अध्यक्ष लोकेन्द्रबहादुर घलेले जानकारी दिए ।
उनका अनुसार यस अस्पतालमा १० वटा आइसोलेसन कक्ष निर्माण गरिएको छ । संक्रमितको थप उपचारमा सहयोग गर्न रेडक्रससँग सहकार्य गरेर निःशुल्क एम्बुलेन्स सेवा सञ्चालनमा ल्याइएको उनले बताए ।
जिल्ला अस्पतालमा बिरामीको चाप हुन सक्ने भन्दै गाउँपालिकाले आप्mनै लगानीमा १० शय्याको अस्थायी अस्पताल बनाएको गाउँपालिकाका प्रमुख प्रशासकीय अधिकृत नरबहादुर चन्दको भनाइ छ ।
गण्डकी प्रदेश सरकारले उपलब्ध गराएको भेन्टिलेटर जनशक्ति अभावमा सञ्चालन गर्न सकिएको छैन । हाल सञ्चालनमा नआएको भेन्टिलेटर गाउँपालिकाले सञ्चालन गर्ने तयारी थालेको छ । अस्पतालले एमडीजीडीपी गरेका डाक्टरको अभावमा थन्किएको सो भेन्टिलेटर र अक्सिजन सञ्चालनका लागि करारमा चिकित्सक नियुक्ति गर्ने प्रक्रिया पनि अघि बढाएको छ । रासस
