काठमाडौं । लघुबीमा कम्पनी क्रेष्ट माइक्रो लाइफ इन्स्योरेन्स कम्पनीले सेवा शुरु गरेको छ । सुर्खेतको वीरेन्द्रनगरमा बुधवार (आज) कार्यालय उद्घाटन भएसँगै कम्पनीको सेवा शुरु भएको हो । बीमा प्राधिकरणले कम्पनीलाई एउटा म्यादी (टर्म) पोलिसी विक्री गर्न स्वीकृति दिएको छ ।
बीमा प्राधिकरणका कार्यकारी निर्देशक राजुरमण पौडेलले कम्पनीको उद्घाटन गरे । उनले कम्पनीलाई तल्लो तहसम्म बीमा सेवा पुर्याउनु निर्देशन दिए ।
कम्पनीका अध्यक्ष ऋषिराज मोरले जीवन बीमालेखको वास्तविक आवश्यकता भएका र बीमा कम्पनीमा समेटिन नसकेका व्यक्तिहरूलाई लघु जीवन बीमा सुविधा उपलब्ध गराई उनीहरूको आर्थिक सुरक्षाको लक्ष्य लिएर कम्पनी स्थापना गरिएको बताए । ‘कम्पनीले अत्याधुनिक प्रविधि प्रयोग गरी दूरदराजका गाउँबस्तीसम्म आफ्ना बीमालेख पुर्याउने छ,’ उनले भने ।
कम्पनीका प्रमुख कार्यकारी अधिकृत प्रतापमान श्रेष्ठले कम्पनीले विकास गरेको ग्राहकमैत्री प्रविधिमार्फत आवश्यकता अनुसारका बीमा योजना कम बीमा शुल्कमा सजिलै प्राप्त गर्न सकिने सुविधा रहेको बताए । कम्पनीले प्रस्तुत गर्ने थोरै बीमा शुल्कका बीमा योजनाबाट लक्षित वर्ग आर्थिक रूपमा लाभान्वित हुने उनको भनाइ छ ।
