अपाङ्गता भएका व्यक्तिलाई औद्योगिक तथा व्यापारिक प्रतिष्ठानमा रोजगार तथा स्वरोजगारको अवसर दिन थालिएसँगै उनीहरूको दैनिक जीवनयापन सहज बन्न थालेको छ । सुनसरी–मोरङ औद्योगिक करिडोरका औद्योगिक तथा व्यापारिक प्रतिष्ठानले यस्ता व्यक्तिलाई क्षमताका आधारमा रोजगारको अवसर दिन थालेका हुन् । नेपाल उद्योग वाणिज्य महासङ्घ प्रदेश १, राष्ट्रिय अपाङ्ग महासङ्घ र द लेप्रोसी मिसन अफ नेपालको त्रिपक्षीय साझेदारीमा स्वरोजगार तथा रोजगारको अवसरका लागि फाउन्ड परियोजनाले काम गरिरहेको छ । नेपाल उद्योग वाणिज्य महासङ्घ प्रदेश १ का उपाध्यक्ष एवं महासङ्घका केन्द्रीय सदस्य राजेन्द्र राउतका अनुसार अपाङ्गता भएका व्यक्तिलाई परियोजनामार्फत रोजगारी दिलाउन महासङ्घले सहजीकरणको भूमिका निर्वाह गरिरहेको हो ।
