जेठ ९, काठमाडौं । नेपाल चेम्बर अफ कमर्सले नेपालमा औद्योगिक ग्राम स्थापनाका लागि मलेशियासँग आग्रह गरेको छ ।
पर्यटन, सूचना प्रविधि, तथा उत्पादनमा एकीकृत लगानीको अवधारणा अन्तर्गत औद्योगिक ग्राम निर्माणका लागि मलेशियालाई चेम्बरले आग्रह गरेको हो । सोमवार काठमाडौंको जमलस्थित चेम्बर भवनमा आयोजित भेटवार्तामा चेम्बरका अध्यक्ष राजेन्द्र मल्लले नेपालका लागि मलेशियाका चार्ज डी अफेयर्स मोद फजले विन अवु हसनसँग मलेशियाको नेपालमा लगानी सुनिश्चित गर्न आफूहरुले पहल गर्ने बताए ।
अध्यक्ष मल्लले भने, ‘नेपाल र मलेशिया बीच श्रमको क्षेत्रमा उच्चस्तरीय सहकार्य हुँदै आएको भन्दै । रेमिट्यान्स भित्र्याउने दृष्टिकोणले पनि मलेशिया नेपालको उत्कृष्ट गन्तव्य बनेको छ । झण्डै ४ लाख नेपाली युवा मलेशियामा रोजगारीमा छन् । श्रम सहकार्यसँगै अन्य विभिन्न क्षेत्रमा लगानीका लागि हामी मलेसिया सरकारलाई आग्रह गर्दछौं ।’
उनले नेपाल र मेलेशिया बीच लगानी सम्वन्धमा सरकारी तवरमै उच्चस्तरीय सहकार्य हुनुपर्ने बताए । सो अवसरमा उनले मलेशियाले नेपालमा खासगरी पर्यटन, जलविद्युत्, सूचना प्रविधि, हस्तकलामा लगानी गर्न सक्ने बताए ।
मलेशियाका चार्च डी अफेयर्स हसनले लगानीका लागि आफूहरु तयार रहेपनि प्रतिफलको सुनिश्चितता सम्बन्धी कानून स्पष्ट हुन नसकेको बताए । उनले भने, ‘मलेशियाले सूचना प्रविधिको क्षेत्रमा पछिल्लो समय दक्षिण एशियाली राष्ट्रमा लगानी बढाइरहेको छ । हामीलाई नेपालमा पनि लगानी गर्न कुनै समस्या छैन । तर प्रतिफल सम्बन्धी नीतिगत व्यवस्थामा स्पष्ट हुन सकेका छैनौं ।’
मलेशियाले अहिले पनि लाखौं नेपाली युवाहरुलाई रोजगारी दिएको बताउँदै उनले आगामी दिनमा यो संख्या थप बढ्न सक्ने बताए । जलविद्युत्, पर्यटन लगायतका क्षेत्रमा नेपालमा लगानी गर्न मलेशिया तयार रहेको उनको भनाइ थियो ।