रसुवा । उत्तरी नाका रसुवागढीबाट चीनमा निर्मित सवारीसाधनको आयात बढ्न थालेको छ । चालू आर्थिक वर्षको साउनदेखि हालसम्म ट्रक ३५, मिनी बस ६, माइक्रोबस १६, कंक्रिट मिक्स्चर लरी तीन, डेलिभरी भ्यान दुई, ठूलो क्रेन एक, विद्युतीय कार चार, टिल्लर ५८, विद्युतीय स्कुटर चार, र साइकल ३६ ओटा आयात भएको रसुवा भन्सार कार्यालयले जानकारी दिएको छ ।
गत आथिक वर्षमा रसुवागढी नाकाबाट साना ठूला गरी ५६८ सवारीसाधन स्वदेश भित्रिएका थिए । यस वर्ष सवारीसाधनको आयात ठूलो संख्यामा बढ्ने संकेत देखिएको छ । कोभिडको संक्रमण बढेसँगै चिनियाँ सवारीसाधन रसुवागढीको मितेरी पुलसम्म चिनियाँ चालकले ल्याउने गरेको र भन्सार जाँचपास भएपछि नेपाली चालकले आफ्नो गन्तव्यतर्फ लाने गरेको कार्यालयका प्रवक्ता नरेन्द्र चौधरीले बताएका छन् ।
निर्माणाधीन विभिन्न जलविद्युत् आयोजनाका लागि आवश्यक पर्ने उपकरणसमेत रसुवागढी नाकाबाट आयात भइरहेको कार्यालयले बताएको छ । आयात हुने अन्य सामग्रीमा तयारी पोशाक, मोबाइल फोन, जुत्ता, चप्पल, कम्प्युटरका पाटर््स, विद्युतीय पार्टपुर्जा, स्याउ, ओखर, लसुन, थर्मसलगायत छन् ।
यस्तै दशैं नजिकिँदै व्यवसायीले स्याउ आयात बढाएका छन् । यही असोज १ देखि ७ गतेसम्ममा २४ कन्टेनर अर्थात् २४० टनभन्दा बढी परिमाणको स्याउ आयात भइसकेको छ । व्यवसायी धर्म पौडेलका अनुसार नेपाली बजारको माग आपूर्ति सहज पार्न फलफूलका साथै सबै प्रकारका सामग्री आयातको व्यवस्थापनमा व्यापारी व्यवसायी व्यस्त छन् । उत्पादक कम्पनीसँग सामान माग गरेपछि छिटो छरितो तवरले चिनियाँँ टान्सपोर्ट कम्पनीले रसुवागढीसम्म ढुवानी गर्ने गरेको छ । चालू आवको साउनदेखि हालसम्म चीनबाट आयात भएका सामग्रीबाट १ अर्ब ५९ लाख ९ हजार रुपैयाँ राजस्व असुली भएको भन्सार कार्यालयले बताएको छ । इन्टरनेट तथा विद्युत्को अवरोध भइरहँदा आयात भएका सामग्रीको जाँचपासका कठिन भएको छ ।
रसुवामा प्राय सबै प्रकारका प्रविधि भित्रिए पनि दिगो र भरपर्दाे हुन सकेको छैन । इन्टरनेटकै अभावमा भन्सार राजस्व असुलीमा बाधा पुगिरहेको भन्सार कार्यालयले बताएको छ । कार्य सञ्चालन गर्न विद्युत्का लागि जेनेटर प्रयोग गर्ने गरिएको र इन्टरनेट सञ्चालनका लागि नेपाल टेलिकमसँग अनुरोध भइरहेको प्रमुख भन्सार अधिकृत रामप्रसाद रेग्मीले जानकारी दिए । अधिकांश समय स्याफ्रुबेँसीदेखि रसुवागढीसम्मको राजमार्ग अवरूद्ध भइरहँदा जाँचपास भएका मालवाहक सवारीसाधन पार गराउन तीन दिनसम्म लाग्ने समस्या छ । रासस
