काठमाडौं । नेपाल विद्युत प्राधिकरणले बक्यौता रकम नतिर्ने थप उद्योगहरूको लाइन काटिने प्रष्ट पारेको छ ।
प्राधिकरणले बिहीवार (आज) आयोजना गरेको पत्रकार सम्मेलनमा कार्यकारी निर्देशक कुलमान घिसिङले बक्यौता रकम नतिर्ने उद्योगहरूको बिजुली काट्दै जाने प्राधिकरणको रणनीति भएको प्रष्ट पारेका छन् ।
प्राधिकरणका अनुसार डेडिकेटेड तथा ट्रंक लाइनबाट विद्युत उपभोग गरेका ६१ उपभोक्ताको २०८० मंसिरसम्म २२ अर्ब २४ करोड रुपैयाँ बक्यौता छ । यसमध्ये अहिलेसम्म ९ ओटा उद्योगको मात्र लाइन काटिएको छ, जसको बक्यौता १२ अर्ब ५० करोड रुपैयाँ हुने उनले जानकारी दिए ।
पटक–पटकको ताकेतामा पनि छुट महसुल तिर्न नआएपछि प्राधिकरणले २०७६ चैत ५ गते विराटनगरबाट उद्योगको विद्युत लाइन काट्न शुरु गरेको थियो ।
