भारतको आर्थिक वृद्धिदर थप बढ्ने मुडिजको अनुमान, 'पूँजीगत खर्च बढेकाले वृद्धिदर बढ्ने'

काठमाडौं । कर्जा रेटिङ एजेन्सी मूडिजले भारतको आर्थिक वृद्धिको प्रक्षेपण बढाएको छ । बुधवारको अनुमान अनुसार सन् २०२३ मा भारतको अर्थतन्त्र साढे ५ प्रतिशतले बढ्ने बताइएको छ । यस अघिको यो अनुमान ४ दशमलव ८ प्रतिशत रहने भनिएको थियो । बजेटमा पूँजीगत खर्चमा तीव्र वृद्धि गरिएको अनि अर्थतन्त्र उत्थनशील भएको तर्फ औंल्याउँदै वृद्धि प्रक्षेपण बढाइएको हो । यद्यपि, सन् २०२२ को वृद्धिदर भने नोभेम्बरको भन्दा शून्य दशमलव २ प्रतिशत घटाएर ६ दशमलव ८ प्रतिशतमा झारिएको छ । अघिल्लो प्रक्षेपणमा गएको वर्ष भारतीय आर्थिक वृद्धिदर ७ प्रतिशत हुने बताइएको थियो । ग्लोबल म्याक्रो आउटलूक २०२३ –२४ मा मूडिजले जीट्वेन्टीमा अमेरिका, क्यानडा, यूरोजोन, भारत, रुस, मेक्सिको लगायत कयौं अर्थतन्त्रमा वृद्धि प्रक्षेपण अर्थपूर्ण तवरले बताएको छ । भारतको मामिलामा भने आगामी आवको बजेटमा १०० खर्ब रुपया बजेट पूँजीगत खर्चका रुपमा विनियोजन गरेसँगै आर्थिक वृद्धिदरमा सकारात्मक संसोधन गरिएको मूडिजले एउटा विज्ञप्तिमा भनेको छ । चालू आवमा यो खर्च ७५ खर्ब रुपया रहेको थियो । मूडिजका अनुसार सन् २०२३ मा रियल जीडीपी ७० आधार अंकले बढेर साढे ५ प्रतिशतमा उक्लिनेछ । २०२४ को वृद्धिदर पनि साढे ६ प्रतिशत हुने बताइएको छ । सन् २०२२ को दोस्रो अर्धवार्षिक सुदृढ डेटाले २०२३ को लागि निकै ठूलो ‘क्यारी ओभर’ इफेक्ट सृजना गरेको पनि मूडिजले बताएको छ । गएको वर्ष विश्वव्यापी र घरेलु स्तरमा मौद्रिक नीति कसिलो बनाउन शुरु गरेका थिए । तर भारतसमेत केही ठूला उदीयमान अर्थतन्त्रहरू सोप्रति आफूले सोचेको भन्दा उत्थानशिल साबित भएको मूडिजको भनाई छ ।  चीनले कोभिड विरुद्धको शून्य सहनशीलताको नीति पूरै हटाएर सीमा खुलाउनु, यूरोपमा अनुमान गरिएको भन्दा चिसो कम हुनु लगायत कारणहरुले गर्दा २०२३ मा कयौं सकारात्मक कुरा भएका छन् ।  अमेरिका समेत विश्वभर कयौं देशहरुले महँगी नियन्त्रण गर्न धमाधम ब्याजदर बढाइरहेकोले कयौं प्रमुख अर्थतन्त्रमा आर्थिक गतिविधि र रोजगारीको अवस्थामा दबाब बढेको भन्दै २०२३ मा विश्वको आर्थिक वृद्धिदर भने सुस्ताउने मूडिजको अनुमान छ । यस अघि २ दशमलव ७ प्रतिशत रहने अनुमान गरिएको जीट्वेन्टीको २०२२ को वृद्धि प्रक्षेपण मूडिजले घटाएर २ प्रतिशतमा झारेको छ । २०२४ मा भने वृद्धिदर सुध्रिएर २  दशमलव ४ प्रतिशत पुग्ने बताइएको छ । २०२३ मा चीनको जीडीपी ५ प्रतिशतले बढ्ने अनुमान गरिएको छ । २०२२ को वृद्धि अनुमान पनि बढाएर ३ प्रतिशतमा उकालिएको छ । एजेन्सी