फागुन १५, काठमाडौं । राष्ट्र उत्थान लघुवित्त वित्तीय संस्था लिमिटेडको आईपीओले पहिलो कारोबारको लागि नेप्सेबाट रू. १६७ दशमलव ४३ देखि रू. ५०२ दशलमव २९ ओपन रेञ्ज पाउने देखिएको छ ।
कम्पनीको आव २०७७/७८ को वास्तविक नेटवर्थ रू. १६७ दशमलव ४३ रहेकाले उक्त रेञ्ज पाउने देखिएको हो । नेप्सेले पहिलो कारोबारको लागि नेटवर्थको तीन गुणासम्म मूल्य रेञ्ज तोक्ने भएकाले कम्पनीले उक्त रेञ्ज पाउनेछ । कम्पनीले आईपीओको बाँडफाँट फागुन १२ गते गरेको हो । ७९ हजार ४५० जनाले १० कित्ताका दरले शेयर पाएका छन् ।
उक्त आईपीओमा कुल २५ लाख ८५ हजार २६१ जनाले आवेदन दिएका थिए । जसमध्ये ५ हजार ८५९ जनाको आवेदन रद्द भएको थियो । कम्पनीले ८ लाख ५० हजार कित्ता शेयर फागुन ४ गतेदेखि ८ गतेसम्म निष्कासन गरेको हो ।
कम्पनीले कुल कित्तामध्ये ४२ हजार ५ सय कित्ता सामुहिक लगानी कोषको लागि १३ हजार कित्ता शेयर कर्मचारीहरुको लागि र बाँकी रहेको ७ लाख ९४ हजार कित्ता शेयर सर्वसाधारणको लागि निष्कासन गरेको हो ।
यसैबीच कम्पनीले शेयर रजिष्ट्रारमा एनआईबिएल एस क्यापिटल लिमिटेडलाई नियुक्त गरेको छ ।
कम्पनीले आईपीओ व्यवस्थापनका लागि उक्त क्यापिटललाई नियुक्त गरेको हो ।
शेयर रजिष्ट्रारमा नियुक्त भएसँगै धितोपत्र कारोबार सम्बन्धी अभिलेख राख्ने, दाखिल खारेज, नामसारी, रोक्का राख्नेलगायतका सम्पूर्ण कार्य एनआईबिएल एस क्यापिटल लिमिटेडमार्फत हुने छ ।
कम्पनीको अधिकृत पूँजी रू. ५० करोड रहेको छ भने जारी पूँजी रू.२६ करोड छ । हाल रू.१७ करोड ५० लाख चुक्तापूँजी रहेको कम्पनीको आईपीओ बाँडफाँट पश्चात् चुक्तापूँजी रू. २६ करोड पुगेको छ ।
