माघ ३, काठमाडौं । ताइवानी चिप निर्माता कम्पनी ताइवान सेमिकन्डक्टर म्यानुफ्याक्चरिङ कम्पनी (टीएसएमसी) ले गत वर्षको अन्तिम त्रैमासमा अहिलेसम्मकै धेरै त्रैमासिक मुनाफा आर्जन गरेको छ ।
विश्वभर चिपको माग बढिरहेकोले आउँदा वर्षहरुमा कम्पनीको वृद्धिदर सुदृढ हुने पनि अपेक्षा गरिएको छ ।कोरोना भाइरसको महामारीबीच विश्वभर स्मार्टफोन, ल्यापटप र अन्य विद्युतीय उपकरणहरुमा प्रयोग हुने चिपको चरम अभाव छ ।
चिप अभावका कारण अटो निर्माताहरु देखि विद्युतीय उपकरण निर्माताहरुसम्म कयौं उद्योगका कम्पनीहरु आफ्नो उत्पादन कटौती गर्न बाध्य बनेका छन् । तर टीएसएमसी र अन्य चिप निर्मातालाई अर्डरको ओइरो लागेको छ । ती कम्पनीहरुको विक्री र मुनाफा दुवै बढेका छन् ।
सन् २०२१ को अक्टोबर–डिसेम्बर त्रैमासमा टीएसएमसीको मुनाफा गत वर्षको सोही अवधिको तुलनामा १६ दशमलव ४ प्रतिशतले बढेर कीर्तिमानी उचाईमा उक्लिएको छ ।
मुनाफामा भएको वृद्धिसँगै यस वर्ष खर्च योजना बढाएर ४० अर्ब देखि ४४ अर्ब डलरसम्म पुर्याउने कम्पनीको योजना छ । गत वर्ष पनि यसले ३० अर्ब डलर लगानीमा खर्चिएको थियो ।
पाँचौ पुस्ता (फाइभ जी) को दूरसञ्चार प्रविधि, कृत्रिम बौद्धिकता एप आदि जस्ता नयाँ प्रविधिले चिपको माग बढाइरहेको अवस्थामा विश्वभर अभाव चुलिएपछि कम्पनीले गत वर्ष चिप निर्माणमा आगामी पाँच वर्षमा १ खर्ब डलर लगानी गर्ने घोषणा गरेको थियो ।
कम्पनी उच्च संरचनात्मक वृद्धिको अवधिमा प्रवेश गरेको टीएसएमसीका प्रमुख कार्यकारी सी.सी. वेईले अनलाइन ब्रिफिङमा भनेका थिए ।
टीएसएमसी एशियाको सबैभन्दा मूल्यवान सूचीकृत कम्पनी हो । यो करारमा चिप बनाउने विश्वको सबैभन्दा ठूलो कम्पनी पनि हो । यो वर्ष पनि कम्पनीलाई माग धान्न हम्मे - हम्मे पर्ने वेईको भनाइ छ । दीर्घकालीन अवधिसम्म चिपको माग उच्च नै रहने पनि उनले बताएका छन् ।
कम्पनीको निकट भविष्यको अर्डर परिदृश्य स्वस्थ रहेको ताइपेईस्थित फुबोन रिसर्चका विश्लेषकहरुले जनवरीको शुरुमा एक नोटमा भनेका थिए । नयाँ प्रविधिका कारण चिपको सुदृढ मागमा ‘बहु–वर्षिय उद्योग मेगाट्रेन्ड’ देखिने भन्दै कम्पनीले आगामी कयौं वर्षको आम्दानीमा वार्षिक चक्रिय वृद्धिको लक्ष्य १० देखि १५ प्रतिशतबाट बढाएर १५ देखि २० प्रतिशतमा पुर्याएको छ ।
आगामी वर्षहरुमा चिपको चाहिनेभन्दा धेरै आपूर्ति हुने हो कि भनेर बजारमा उत्पन्न चिन्तालाई वेइले वेवास्ता गरेका छन् । विधुतीय कारजस्ता टेक ग्याजेटमा ‘सिलिकन कन्टेन्ट’ को उल्लेख्य वृद्धिले बजारमा देखिने करेक्शनको प्रभाव सहन टीएसएमसीलाई मद्दत गर्ने वेईको भनाइ छ ।
करेक्शनहरु आयो नै भने पनि बजारमा कम्पनीका प्रविधि अग्रणी स्थानमा भएको र संरचनात्मक मेगाटेन्डका कारण यो टीएसएमसीका लागि कम अस्थीर हुने उनी बताउँछन् ।
कम्पनीले आफ्नो ग्रस मार्जिनमा ५३ प्रतिशत वा सोभन्दा बढीको दीर्घकालीन वृद्धि लक्ष्य तय गरेको छ । यो यसअघि तय गरिएको ५० प्रतिशत वा सो भन्दा बढीको दीर्घकालीन वृद्धि लक्ष्यभन्दा धेरै हो ।
यो वर्षको पहिलो त्रैमासमा कम्पनीको आम्दानी १६ अर्ब ६० करोड डलरदेखि १७ अर्ब २० करोड डलर रहने टीएसएमसीको प्रक्षेपण छ । गत वर्षको सोही अवधिको आम्दानी १२ अर्ब ९२ करोड डलर थियो । यो वर्षभर भने अमेरिकी डलरमा आम्दानी २५ देखि २९ प्रतिशतले बढ्ने अपेक्षा गरिएको छ ।
अक्टोबर–डिसेम्बर त्रैमासमा कम्पनीको आम्दानी गत वर्षको सोही अवधिको तुलनामा २४ दशमलव १ प्रतिशतले बढेर १५ अर्ब ४० करोड डलर पुगेको थियो । खूद मुनाफा पनि एक वर्ष अघिको १ खर्ब ४२ अर्ब ८० करोड ताइवानी डलरबाट बढेर समीक्षा अवधिमा १ खर्ब ६६ अर्ब २० करोड ताइवानी डलर (६ अर्ब १ करोड डलर) मा उक्लिएको छ ।
यो विश्लेषकहरुको प्रक्षेपणको तुलनामा धेरै हो । रिफिनिटिभले २२ जना विश्लेषकमाझ गरेको सर्वेक्षणमा खूद मुनाफा सो अवधिमा औसत १ खर्ब ६१ अर्ब ६० करोड ताइवानी डलर रहने बताइएको थियो ।
यो वर्षको अहिलेसम्मको अवधिमा टीएसएमसीको शेयरमूल्य करीब ७ प्रतिशतले बढेको छ । योसँगै कम्पनीको बजार पूँजीकरण पनि बढेर ६ खर्ब १८ अर्ब डलरमा पुगेको छ । (एजेन्सीको सहयोगमा)
