गर्मीयाममा स्वीमिङ पुल भन्नेबित्तिकै धेरैलाई नुहाउन पसिहालौं जस्तो होला । त्यसैमाथि दिनभर खेलेर थाकेका खेलाडीहरूलाई त स्वीमिङ पुल आराम गर्ने उपाय पनि हुनसक्छ । तर, देशकै ठूलो दशरथ रंगशालास्थित राष्ट्रिय खेलकुद परिषद् भवनको पछाडि रहेको स्वीमिङ पुलको अवस्था भने अस्तव्यस्त छ ।उखर्माउलो गर्मीमा स्वीमिङ खेल्न जानेहरूले स्वीमिङ पुलमा नीलो पानीको सट्टा थोत्रा गाडी, कुर्सीहरू, ट्यांकी, जस्तापातालगायत फलामले भरिएको थुप्रो देख्छन् ।२०७२ सालको भूकम्पमा क्षतिग्रस्त भएको यो स्वीमिङ पुलको अवस्था अहिले कबाडीखानामा रुपान्तरण भए जस्तै देखिएको छ । यो स्वीमिङ पुल त्यही हो, जहाँ सन् १९८४ मा पहिलो दक्षिण एसियाली खेलकुदको पौडी प्रतियोगिता आयोजना गरिएको थियो । १२ फिट गहिराइको स्वीमिङ पुल व्यावसायिक प्रायोजनमा सञ्चालन गर्न खेलकुद परिषद्ले ध्यान दिनुपर्ने सरोकारवाला बताउँछन् ।
