भक्तपुर । नयाँ वर्ष २०७९ का अवसरमा भक्तपुरको सल्लाघारीमा औद्योगिक तथा व्यापार मेला लागिरहेको छ ।
मेलाको पाँचौँ दिनमा एक करोड ५० लाख रुपैयाँको कारोबार भएको छ । मेलामा कारोबार बढ्दै गएको आयोजक औद्योगिक शान्ति नेपाल संस्थाका अध्यक्ष सन्दीप महतले जानकारी दिए । दैनिक उपभोग्य सामग्री, लत्ताकपडा, जुत्ता, कृषि तथा हस्तकलाका सामग्री, नयाँ तथा पुराना सवारीसाधन खरिदमा उपभोक्ताको आकर्षण रहेको पनि उनले बताए ।
मेलामा फेशन तथा नृत्य, औद्योगिक उत्पादनको प्रदर्शनी, सूचना तथा विज्ञान प्रविधिको प्रदर्शनी, ग्रामीण प्रविधिसम्बन्धी गतिविधि, अटो मोबाइल प्रदर्शनी, विद्युतीय मेशिन, कृषि औजार प्रदर्शनीलगायत रहेको मेला संयोजक दीपक थापाले जानकारी दिए । मेलामा विद्यार्थीलाई ४० र अन्यलाई ५० रुपैयाँ प्रवेश शुल्क निर्धारण गरिएको छ ।
यही चैत २४ देखि शुरू भएको उक्त मेला आगामी वैशाख ४ गतेसम्म चल्नेछ । मेलामा २ सयभन्दा बढी कक्ष राखिएको आयोजकले जानकारी दिएको छ ।
मेलामा ८ करोड रुपैयाँ बराबरको कारोबार हुने आयोजकको अनुमान छ । औद्योगिक शान्ति नेपाल संस्था र मध्यपुर ब्वाइज ब्याण्डले मेला आयोजना गरेका हुन् । कोरोना महामारीका कारण लामो समय रोकिएका व्यापार मेला तथा प्रदर्शनीहरू विस्तारै लयमा फर्किन थालेका छन् । रासस
