काठमाडौं । बिहीवारदेखि लुम्बिनीमा दोस्रो बुद्धिस्ट अन्तरराष्ट्रिय ट्राभल मार्ट सञ्चालन हुने भएको छ ।
कोरोना भाइरसपछि पर्यटक आगमनलाई तीव्र बनाउने उद्देश्यले नेपाल एसोशिएशन अफ टुर एन्ड ट्राभल एजेन्ट्स (NATTA) ले ११ देखि १३ मेसम्म मार्ट आयोजना गर्ने तयारी अन्तिम चरणमा पुर्याएको छ ।
यो मार्टले नेपाली टुर, ट्राभल कम्पनी र होटेल व्यवसायीका साथै अन्तरराष्ट्रिय विमानस्थल गौतमबुद्ध सञ्चालनमा समेत सघाउने नाट्टाको अपेक्षा छ । नाट्टा अध्यक्ष रमेश थापाले विदेशी टुर, ट्राभल कम्पनीहरूसँग व्यापार साझेदारी गर्ने सम्भावना वृद्धि हुने र लुम्बिनीमा विश्वभरका पर्यटक ल्याउन थप मद्दत पुग्ने बताए । लुम्बिनी प्रदेशमा सञ्चालित नेपाली ट्राभल टुर कम्पनी, होटेल व्यवसायीको लगानीअनुसार प्रचारप्रसार र प्रतिफल प्राप्त गर्न सहयोग पुग्ने पनि उनको धारणा छ ।
विश्वभर नेपाल भ्रमणका लागि सन्देश प्रवाह गर्ने र बुद्धभूमि लुम्बिनीलाई केन्द्रमा राख्दै सम्पदा, आध्यात्मिकलगायत पर्यावरणीय साहसिक पर्यटन प्रवर्द्धन गर्ने मार्टको उद्देश्य रहेको बताइएको छ ।
बुद्धिस्ट अन्तरराष्ट्रिय ट्राभल मार्टको सचिवालयले भारत, मलेशिया, चीन, कोरिया, बंगलादेश, म्यानमार, थाइल्यान्ड, श्रीलंकालगायत देशबाट ३५ भन्दा बढी ट्राभल, टुर कम्पनी सहभागी हुने जानकारी दिएको छ ।
यो मार्ट सञ्चालनबाट नेपाली टुर, ट्राभल कम्पनीहरू र होटेल व्यवसायीले विदेशी टुर, ट्राभल कम्पनीहरूसँग व्यापार साझेदारी गर्ने सम्भावना बढ्ने बताइएको छ ।