काठमाडौं । नेशनल बैंकिङ्ग ईन्ष्टिच्युट लिमिटेडले पुस ५ गते १५औं वार्षिक साधारण सभा बोलाएको छ । होटेल याक एण्ड यति, काठमाडौंमा अपराह्न ४ बजे कम्पनीले सभा बोलाएको हो ।
सभाले गत आर्थिक वर्ष ०७९/८० को वार्षिक प्रतिवेदन सहितका वित्तीय विवरण पारित गर्नुका साथै चालू आर्थिक वर्षको लागि लेखापरीक्षक नियुक्ति र निजको पारिश्रमिक निर्धारणलाई समेत टुङ्ग्याउनेछ ।
कम्पनीको अधिकृत पूँजी ४० करोड र जारी पूँजी ३० करोड कायम गर्ने प्रस्ताव सभाका लागि तय भएको छ । कम्पनीले चुक्ता पूँजी १९ करोड ७५ लाख कायम गर्ने गरी २९५ प्रतिशत बोनस शेयर वितरणको प्रस्ताव समेत गरेको छ । हाल कायम चुक्ता पूँजीको आधारमा कर प्रयोजनका लागि १५ दशमलव ५३ प्रतिशत नगद लाभांश वितरणको प्रस्ताव पनि सभाले पारित गर्नेछ ।
कम्पनीको सञ्चालक समितिको बैठकले नियुक्त गरेको स्वतन्त्र सञ्चालक र सञ्चालकलाई अनुमोदन पनि सभाले गर्नेछ । कम्पनीको सञ्चालक समितिको बैठकले नेपाल बैंकर्स एशोसियशनको तर्फबाट अनिल शर्मा स्वतन्त्र सञ्चालक र नेपाल एसबिआई बैंकको तर्फबाट राजेश कुमार पण्डालाई सञ्चालकमा नियुक्त गरेको थियो ।
यस कम्पनीमा बैंक तथा वित्तीय संस्थाहरूको स्वामित्व बढाउन हाल कायम शेयरधनीहरूका अतिरिक्त अन्य सम्पूर्ण क, ख, ग, घ वर्गका बैंक तथा वित्तीय संस्थाहरूलाई जारी पूँजीको हदसम्म प्रतिशेयर १०० रुपैयाँमा शेयर जारी गर्ने प्रस्ताव पनि सभाका लागि तय भएको छ ।
