उखुको समर्थन मूल्यसम्बन्धी प्रस्ताव तयार

उखुको न्यूनतम समर्थन मूल्य तोक्नेसम्बन्धी प्रस्ताव तयार भएको छ । कृषि तथा पशुपन्छी विकास मन्त्रालयले उद्योग, वाणिज्य तथा आपूर्ति मन्त्रालयमार्फत उखुको न्यूनतम समर्थन मूल्य मन्त्रिपरिषद्मा सिफारिस गरेको हो । कृषि मन्त्रालयले उखु किसान, चिनी उद्योगीलगायत अन्य सरोकारवालासँग छलफल गरेर उक्त प्रस्ताव मन्त्रिपरिषद्मा पठाइएको कृषिमन्त्री महिन्द्रराय यादवले जानकारी दिनुभयो । “उखुको मूल्य निर्धारण गरेर उद्योग मन्त्रालयमा पठाएका छौँ । उद्योग मन्त्रालयले जति छिटो मन्त्रिपरिषद्मा लैजान्छ त्यति छिटो मूल्य निर्धारण हुन्छ,” उहाँले भन्नुभयो ।